Katër persona janë vënë në ndjekje penale nga prokuroria dhe policia e Vlorës, pasi dyshohet se kanë ngritur në mënyrë të paligjshme kryqin e çeliktë në Himarë dhe kanë bërë thirrje që ngjallin urrejtjen etnike.

Aleks Bala, Agron Buta, Artur Lapa dhe Manol Zoto janë proceduar nga policia e Vlorës në gjendje të lirë nga policia e Vlorës dhe siç mësohet nga burime pranë këtij institucioni, që prej datës 5 prill 2020, hetimi për këtë çështje është marrë nga prokuroria e Vlorës.

Kryqi i çeliktë i ngritur në Himarë, mësohet se është ndërtuar në një vend të shenjtë, pasi aty ndodhet dhe një manastir. Por me sa duket personat që kanë ngritur këtë kryq nuk janë pajisur me leje ndërtimi nga institucionet përkatëse dhe për pasojë është vendosur nisja e hetimeve për akuzën e “Ndërtimit të paligjshëm”.

Ndërkohë një tjetër akuzë për të cilën policia ka kërkuar ndjekje penale ndaj katër personave të mësipërm është dhe ajo e “Nxirjes së urrejtjes”, pasi Aleks Bala, Agron Buta, Artur Lapa dhe Manol Zoto kanë shpalosur disa flamurë të “Vorio Epirit” duke lëshuar dhe thirrje nacionaliste.

Tashmë ky material policor ndodhet në prokurori për vlerësim të gjithë situatës së kësaj ngjarje ku pas verifikimeve që do kryhen, në ditët në vijim do meret dhe vendimi nëse do kemi persona të akuzuar ose jo për këtë ngjarje.