Nis me skandal koncesioni i
ngjyrosjes së karburanteve

Nis me skandal koncesioni i<br />ngjyrosjes së karburanteve
TIRANE- Për koncensionin e ngjyrosjes së karburantëve vijnë fakte të tjera dyshuese. Pas një investigimi të bërë, “Top Channel” ka mundur të sigurojë një sërë dokumentash doganorë, të cilët faktojnë mospërputhje të mëdha në vlerën financiare të importeve të ngjyruesve nga kompania koncesionare "Global Fluids".

Rasti për të cilin ka investiguar “Top Channel” bën fjalë për një ngarkesë të nisur nga Hollanda me rreth 3465 litra ngjyrues, për të cilën kompania ka deklaruar në doganën shqiptare vlerën 2 milionë e 938 mijë euro. Fatura e deklaruar nga kompania në doganën shqiptare për importin e saj të parë të ngjyruesve mban datën 27 maj 2013.
Ndërkohë, dokumenti që fakton eksportin nga autoritetet doganore të Hollandës për të njëjtën ngarkesë flet për shifra të tjera. Ndryshimi në vlerë është 157 herë. Sipas deklarates së lëshuar nga autoritetet hollandeze, vlera e mallit rezulton vetëm 18 mijë e 600 euro. Mospërputhja e madhe në vlerë është konstatuar më vonë nga autoritetet e doganës shqiptare.

Përballë këtij fakti vetëm tre ditë pas zhdoganimit në datën 11 korrik, kompania e ka rieksportuar sërish ngarkesën për në Hollandë, siç tregon edhe dokumenti. Zotërohen pamje të daljes se kamionit ne doganën e Qafë-Thanës, ku kamioni eshte kontrolluar, por jo ndaluar nga autoritetet doganore shqiptare. Këtë herë vlera e deklaruar është 24 mijë dollarë.

“Top Channel” kontaktoi me kompaninë, e cila ka pranuar mospërputhjet por i ka cilësuar ato si gabim. Përmes një e-maili 'Global Fluids' është përgjigjur se dega e saj në Shqipëri ka deklaruar vlerën reale të mallit, por në dokumentet e eksportit që janë dorëzuar në doganën shqiptare, sipas saj, kompania transportuese ka dorëzuar gabimisht dhe faturën e transportit me vlerë 18640 euro. 'Global Fluids' përgjigjet se shumë shpejt ngarkesa do të rikthehet në Shqipëri me dokumentat të reja.
Por ky version ngre një tjetër problem. Pas konstatimit të diferencave në vlerë nga autoritetet doganore, ngarkesa ka qenë në procedurë kontrolli. Sipas Kodit Doganor në raste të tilla mallrat bllokohen dhe nuk mund të kryejnë më asnjë procedurë tjetër derisa të përfundojë hetimi, pra, qe malli te largohet apo te hyje ne treg, ndërkohë që ndodhi krejt e kundërta: kompania u lejua t'i rieksportonte ato.

Nëse autoritetet do të vërtetojnë se kompania ka tentuar të rrisë fiktivisht shpenzimet, për të justifikuar tarifën e lartë që përfiton nga koncesioni dhe për të shmangur taksat, rasti do të përbënte skandalin e radhës në kontratat koncesionare.

Dyshimi për manipulimin e shpenzimeve është një fenomen që haset thuajse të të gjitha koncesionet në Shqipëri. Madje në industritë më fitimprurëse si minierat apo dhe nafta, prej 13 vitesh të gjitha kompanitë koncesionare në seri, nuk kanë paguar deri më sot asnjë lekë tatim-fitimi në buxhet sepse deklarohen me humbje nga shpenzimet e larta.
Për disa ekspertë kontratat koncesionare kanë ndërtuar në Shqipëri realitetin e një ekonomie koloniale, ku kompani të huaja që shfrytëzojnë pasuri natyrore dhe të drejta eskluzive të shtetit, marrin fitime kolosale dhe shmangin edhe detyrimet më bazë. Kompania koncesionare qe fitoi monopolin e ngjyrosjes se karburanteve, me nje investim total vetem 4 milione euro, do te perfitoje 200 milione euro te shtire ne nje periudhe disavjeçare. Pak dite me pare edhe deputeti socialist Erjon Braçe e akuzoi kompanine per mashtrim fiskal.

(Marrë nga "Top Channel", përgatiti Muhamed Veliu)

Redaksia Online
(e.s/shqiptarja.com)

  • Sondazhi i ditës:

    Skandali me mbetjet toksike, sipas jush e kujt është përgjegjësia?



×

Lajmi i fundit

‘Portat e Ferrit’ të Turkmenistanit, një mister që po mahnit vizitorët e Azisë Qendrore

‘Portat e Ferrit’ të Turkmenistanit, një mister që po mahnit vizitorët e Azisë Qendrore