Nishani: Qeveria t'i dorëzojë
Prokurorisë pajisjen e përgjimit

Presidenti i Republikës, Bujar Nishani, ka reaguar sërish për çështjen e përgjimeve. Përmes një deklarate të zyrës së shtypit pranë Presidentit, thuhet se kreu i shtetit i kërkon qeverisë shqiptare që të mos pengojë më tutje ushtrimin e funksionit kushtetues dhe detyrën ligjore të Prokurorisë së Shtetit për hetimin e ekzistencës dhe përdorimit të një pajisjeje interceptuese nga ana e Ministrisë së Brendshme.
 
"Qeveria t’i dorëzojë sa më parë autoriteteve të hetimit pajisjen e kërkuar nga organi i Prokurorisë dhe të gjithë dokumentacionin tjetër të nevojshëm për procesin e hetimit", thuhet në reagimin e Presidencës.
 
Sipas Nishanit, janë mashtrime pretendimet e qeverisë se pajisja i përket italianëve dhe se përdoret për trajnim.
 
"Qeveria të ndalojë përpjekjet për mashtrimin e opinionit publik në lidhje me marrëveshjet e bashkëpunimit me shtetin italian", theksohet më tej në këtë deklaratë, ndërsa vijon se, "marrëveshja e bashkëpunimit midis shtetit shqiptar dhe atij italian në luftën kundër krimit të organizuar nuk ka asnjë lidhje me veprimet antiligjore dhe të dënueshme të përdorimit të mjeteve ilegale dhe të paligjshme nga Policia shqiptare".
 
"Presidenti i Republikës dënon dhe distancohet nga tentativa e papërgjegjshme e Qeverisë për të ngatërruar bashkëpunimin dhe partneritetin e shkëlqyer midis Shqipërisë dhe Italisë në luftën kundër krimit të organizuar, me veprime ilegale dhe të paligjshme të segmenteve të caktuara të Ministrisë së Brendshme në Shqipëri", vijon deklarata e Presidencës.
 
Në përfundim, Presidenti i Republikës, Bujar Nishani i kërkon Prokurorit të Përgjithshëm të ushtrojë të gjithë autoritetin ligjor për të shmangur çdo pengesë që krijohet në hetimin dhe zbulimin e së vërtetës.

Redaksia Online
l.q/Shqiptarja.com