Grupi i Alibejt ka mohuar pjesëmarrjen te protesta para inceneratorit, Meta: Po përdorin alibi! Kriteri për të qenë opozitar, të jesh kundër Ramës

TIRANË- Dyzimit të deputetëve të grupit Alibeaj në Partinë Demokratike për të qenë pjesë e protestës së thirrur prej tij para incenratorit të Tiranës, Ilir Meta iu përgjigj nga selia e Partisë së Lirisë. Mbështetësit e Sali Berisha kanë konfirmuar pjesëmarrjen, ndërsa mbështetësit e Enkelejd Alibeaj nuk do të jenë, ndër to edhe kryetarja e Komisionit Hetimor për Inceneratorët, Jorida Tabaku. Meta tha se rezistenca është detyrë, ndërsa shtoi se ata që duan të gjejnë alibi i shpikin kurdo. Kriteri i vetëm për të qenë opozitë, sipas Metës, është të jesh kundër Ramës.

‘Kush gjen alibi, ka gjithmonë rrugën e hapur. Ka vetëm një kriter për të qenë opozitar, je apo jo kundër Edi Ramës’- tha Meta.

Meta thotë se protesta e së martës nuk do të jetë politike, madje nuk do të ketë as simbole partish, duke bërë thirrje që qytetarët t'i bashkohen.

 ‘Atje ku padrejtësia kthehet në ligj, rezistenca është detyrë për të gjithë. Ne ndërmorëm këtë iniciativë, ndërkohë kjo do të jetë protestë e qytetarëve, gjithmonë dikush merr iniciativë për protestat, kjo nuk është çështja më e rëndësishme. Shqipëria dhe shqiptarët duhet të protestojnë çdo ditë sepse janë vjedhur dhe po përgatiten vjedhje të tjera, ndaj është detyra e çdo qytetari që ndihet i vjedhur të protestojë, të jetë atje dhe në këtë manifestim do jemi të gjithë me flamurin e qytetarisë, transparencës dhe me asnjë flamur partie apo force politike., tha Meta.

Ndonëse PD e Berishës  u la jashtë organizimit të 13 shtatorit, deputetët e Rithemelimit bashkë me ish kryeministrin e kanë konfirmuar pjesëmarrjen e tyre në protestën para inceneratorit të Tiranës. Meta sqaroi se vendndodhja e tubimit bëhet në mënyrë simbolike pasi sipas tij është simbol i korrupsionit qeveritar.

Një ditë para nisjes së vitit të ri shkollor, kryetari i Partisë së Lirisë, Ilir Meta në një deklaratë për mediat ka folur në lidhje me problematikat e arsimit në vend. Meta e nisi fjalën tij duke kritikuar deklaratën e ministrit të brendshëm Bledi Çuçi, i cili tha në një studio televizive se pa krim nuk ka zhvillim. Kjo për Metën është në deklaratë shokuese, ndërsa shtoi se qeveria është kthyer në promotoren e krimit.

Kryetari i Partisë së Lirisë, tha ndër të tjerë se qeveria shqiptare ka buxhetin më të ulët në rajon për arsimin dhe se pa një buxhetim të mirë, nuk mund të ketë një arsim cilësor. Sipas Metës nëse arsimi do të ishte zgjidhje për të rinjtë, vendi do të kishte shpëtuar nga kjo epidemi shpopullimi.

‘Javën e kaluar dëgjuam një deklaratë shokuese ku shprehej se pa krim nuk ka zhvillim një deklaratë e papranueshme nga përfaqësuesi i qeverisë. Nga përfaqësuesi i qeverisë e cila është kthyer në promovuesen më të zjarrtë të krimit dhe anti-vlerave. Në fakt duhet thënë me forcë dhe duhet punuar me forcë e vizion pa arsim nuk ka zhvillim. Zhvillimin e sjell vetëm një arsim cilësor. Nesër nis edhe viti i ri shkollor dhe urojmë të gjithë vogëlushët që nisin klasën e parë. Vendi ynë ka nevojë për politika cilësore për arsimin. Arsim cilësor pa buxhetim nuk mund të ketë. Buxhetin për arsimin qeveria e ka më të ulëtin. Pakësimi i dukshëm çdo vit i numrit të nxënësve. Nëse arsimi do të ishte zgjidhje epidemia e shpopullimit masiv nuk do të kishte pasur vend në Shqipëri. Kriza e rritje se çmimeve ka vendosur në vështirësi financiare mijëra familje.’- tha Meta.

M.Q./Shqiptarja.com

TAG:
• Partia e Lirise
• ministria e arsimit
• Ilir Meta