OKB dënon Këshillin e Sigurimit:
Dështoi me krizën në Siri

Asambleja e Përgjithshme e Kombeve të Bashkuara miratoi me shumicë votash rezolutën që dënon Këshillin e Sigurimit, i cili dështoi në zgjidhjen e krizës siriane.

Dokumenti jodetyrues, i hartuar nga Arabia Saudite, që haptazi përkrah kryengritësit, u miratua me 133 vota, 12 kundër dhe 31 abstenime. Miratimi vjen një ditë pas dorëheqjes së të dërguarit të Kombeve të Bashkuara dhe Ligës Arabe, Kofi Annan dhe dështimit të planit të tij gjashtë pikësh.

Ban Ki Moon, shefi i OKB-së tha para votimit se konflikti në Siri është bërë si një “prokurë lufte” dhe u bëri thirrje fuqive të mëdha për të kapërcyer rivalitetin e tyre dhe të veprojnë për t’i dhënë fund dhunës.

Ban tha se lojtarët ndërkombëtarë po luftojnë për armatosje të njërit ose krahut tjetër në Siri, ndërsa kanë lënë pas interesat imediate të popullit sirian.

Projekt rezoluta denoncon përdorimin e armëve të rënda nga regjimi, si përdorimin e tankeve, artilerisë, helikopterëve dhe avionëve në luftë me popullin në Aleppo dhe Damas. Rezoluta i kërkon Basher Al Assad të mbajë në kontroll të rreptë armët e tij kimike dhe biologjike.

Kina dhe Rusia kanë venë tre herë veton ndaj rezolutave të mëparshme që parashikojnë sanksione apo ndërhyrje ushtarake në Siri.

Ban Ki Moon u shpreh sot se Aleppo, qyteti më i madh i Sirisë, është kthyer në epiqendër të një beteje të egër mes qeverisë siriane dhe opozitarëve.

Ai tha se brutaliteti i raportuar mund të përbëjë bazë për akuza për krime kundër njerëzimit ose krime lufte.

"Aktet e tilla duhet të hetohen”, tha ai. Projekt rezoluta u miratuar në kuvendin me 193 anëtarë, por përfaqësuesit e vendeve arabe këmbëngulën për heqjen e dy dispozitave kryesore kërkesën që Assad të japë dorëheqjen si dhe një thirrje drejtuar kombeve të tjera për të vendosur sanksione ndaj Sirisë.

Si të gjitha rezolutat e tjera të Asamblesë së Përgjithshme të OKB-së edhe kjo e sotmja është jo detyruese dhe bart vetëm fuqi simbolike.
(ns/Shqiptarja.com)