Operacioni “Zona 13”, prangoset
shpërndarësi i heroinës në Korçë

Një 35-vjeçar është arrestuar nga Policia e Korçës pasi u shpërndate heroinë përdoruesve të ndryshëm në qytetin e Korçës. Mariglen Viso, ishte në ndjekje nga Policia dhe po përgjohej.

Burime të Report TV nga Policia e Shtetit sqaruan se janë vënë në ndjekje disa përdorues të heroinës dhe më pas u zbulua personi I cili merrej me shpërndarjen.

Për 3 muaj 35-vjeccari përgjohej, pavarisht se i ndrronte numrat e telefonit çdo javë.
Pasi u bindën se M.V ishte kthyer në shpërndarësin kryesor të heroinës në Korçë, Policia ka organizuar operacionin “zona 13”, duke vënë në pranga 35-vjeçarin.

 
Njoftimi i plotë i Policisë së Korçës:
 
Finalizohet operacioni policor ndjekur me metoda speciale të hetimit i koduar "Zona 13".

Ndalohet një shpërndarës i drogave të forta (heroinë), në doza të vogla.

Specialistët e Seksionit për Narkotikët në Drejtorinë Vendore të Policisë Korçë, falë një pune të mirëorganizuar, në bashkëpunim me Prokurorinë e Rrethit Gjyqësor Korçë, pas një hetimi tre mujor duke përdorur metoda speciale të hetimit, kanë finalizuar operacionin policor të koduar "Zona 13" si rezultat i të cilit u bë ndalimi i shtetasit : 

Mariglen Viso, 35 vjeç, banues në Korçë.

Ndalimi i tij u bë pasi, Gjykata e Rrethit Gjyqësor Korçë me vendim nr 286, datë 10.09.2017 ka caktuar, për këtë shtetas masën e sigurisë "Arrest në burg" për veprën penale : "Prodhimi dhe shitja e narkotikëve” parashikuar nga neni 283/1 i Kodit Penal.

Gjatë periudhës të kryerjes së hetimeve lidhur me këtë rast, është vërtetuar me fakte se shtetasi i mësipërm, iu ka shitur 6 personave (përdorues të lëndëve narkotike)
doza me lëndë të dyshuar si narkotike, të cilat iu janë gjetur e sekuestruar këtyre të fundit me cilësinë e provës materiale.

Materialet i kaluan Prokurorisë të Rrethit Gjyqësor Korçë, për hetime të mëtejshme.
 
Redaksia Online
N.M/Shqiptarja.com