SPAK ka mbyllur hetimet dhe dërguar për gjykim 6 persona të pandehur për korrupsion dhe ndikim të paligjshëm në kuadër të operacionit "Ura" që u zhvillua në maj nga SPAK dhe autoritetet italiane. Në gjyq janë dërguar avokati Armand Tragaj, Edison Cukaj (Gjoka), Serxhio Shkodra, Ervis Deti, Bexhed Mema dhe Naim Behluli. SPAK thotë se çështja për këta të pandehur është e ndarë nga personat e tjerë që janë goditur nga ky operacion, dhe rezulton se janë përfshirë në disa episode korruptive. 

Avokati Armand Tragaj akuzohet se ka komunikuar nëpërmjet SkyEcc dhe ka ushtruar ndikim të paligjshëm te funksionarët e lartë për të ndikuar në favor të klientëve të tij. Sipas organit të akuzës, bëhet fjalë për 4 episode korruptive të kryera nga avokati Tragaj, ndaj të cilit rëndojnë veprat penale ushtrimi i ndikimit të paligjshëm ndaj funksionarëve publikë, dhe korrupsion aktiv. 

Edison Cukaj (Gjoka), sipas SPAK, i cili u ekstradua nga Italia më 10 gusht, akuzohet se i ka dhënë një shumë prej 3 mijë eurosh Ervis Detit, Serxhio Shkodrës dhe Bexhed Mema në mënyrë që të ndikonin te punonjësi në portin e Durrësit Naim Behluli për të shkuar drejt Italisë. Në dosje zbardheshin bisedat Edison Gjokës dhe Ervis Detit për të mundësuar kalimin në mënyrë të paligjshme drejt Italisë. 

Ndërkohë SPAK vijon hetimet për pjesën tjetër të grupit të goditur nga ky operacion dhe që akuzohet për trafikun ndërkombëtar të lëndëve narkotike dhe pastrimit të parave në Shqipëri.

Akuzat ndaj 6 të pandehurve: 
Armand Tragaj - “Ushtrimi i ndikimit të paligjshëm ndaj personave që ushtrojnë funkisone publike”, “Korrupsioni aktiv i dëshmitarit, i ekspertit ose përkthyesit”
Edison Cukaj (Gjoka) - “Ushtrimi i ndikimit të paligjshëm ndaj personave që ushtrojnë funksione publike"
Serxhio Shkodra - “Ushtrimi i ndikimit të paligjshëm ndaj personave që ushtrojnë funksione publike”
Ervis Deti - “Ushtrimi i ndikimit të paligjshëm ndaj personave që ushtrojnë funksione publike”
Bexhed Mema - “Ushtrimi i ndikimit të paligjshëm ndaj personave që ushtrojnë funksione publike”
Naim Behluli - “Shpërdorim i detyrës”

Njoftimi i plotë i SPAK:

Prokuroria e Posaçme kundër Korrupsionit dhe Krimit të Organizuar përfundoi hetimet dhe ka dërguar më datë 21.10.2025 pranë Gjykatës së Posaçme të Shkallës së Parë, kërkesën për gjykimin e procedimit penal nr.36/3 të vitit 2025, në ngarkim të gjashtë të pandehurve të akuzuar për veprat penale; “Ushtrim i ndikimit të paligjshëm ndaj personave që ushtrojnë funkisone publike”, “Korrupsion aktiv i dëshmitarit, i ekspertit ose përkthyesit” dhe “Shpërdorim i detyrës”,  i parashikuar nga nenet 245/1, 312, 248 dhe 25 të Kodit Penal. 

Të pandehurit:

Armand Tragaj, me profesion avokat, i akuzuar kryerjen e veprave penale “Ushtrimi i ndikimit të paligjshëm ndaj personave që ushtrojnë funkisone publike”, (kryer në 4 episode), parashikuar nga nenet 245/1, paragrafi 4 i Kodit Penal dhe “Korrupsioni aktiv i dëshmitarit, i ekspertit ose përkthyesit”, parashikuar nga neni 312 i Kodit Penal.

Edison Cukaj (Gjoka), i akuzuar për kryerjen e veprave penale “Ushtrimi i ndikimit të paligjshëm ndaj personave që ushtrojnë funksione publike”, kryer në bashkëpunim parashikuar nga neni 245/1, paragrafi 4 e 25 i Kodit Penal.

Serxhio Shkodra, i akuzuar për kryerjen e veprave penale “Ushtrimi i ndikimit të paligjshëm ndaj personave që ushtrojnë funksione publike”, kryer në bashkëpunim parashikuar nga neni 245/1, paragrafi 4 e 25 i Kodit Penal.

Ervis Deti, i akuzuar për kryerjen e veprave penale “Ushtrimi i ndikimit të paligjshëm ndaj personave që ushtrojnë funksione publike”, kryer në bashkëpunim parashikuar nga neni 245/1, paragrafi 4 e 25 i Kodit Penal.

Bexhed Mema, i akuzuar për kryerjen e veprave penale “Ushtrimi i ndikimit të paligjshëm ndaj personave që ushtrojnë funksione publike”, kryer në bashkëpunim parashikuar nga neni 245/1, paragrafi 4 e 25 i Kodit Penal.

Naim Behluli, me detyrë punonjësi i policisë kufitare të pikës së kalimit kufitar të Portit Durrës,  i akuzuar për kryerjen e veprave penale “Shpërdorim i detyrës”, i parashikuar nga neni 248 i Kodit Penal.

Faktet penale:

Gjatë hetimeve për procedimin penal 36 të vitit 2019 kanë rezultuar faktet penale të mëposhtme në ngarkim të shtetasve të përmendur. Në vijim, prokurorët e çështjes e kanë ndarë këtë procedim duke regjistruan procedimin nr 36/3 të vitit 2025. Gjatë hetimeve të kryera në kuadër të Skuadrës së Përbashkët Hetimore me autoritetet italiane për trafikun e lëndëve narkotike janë evidentuar edhe episodet e mëposhtme të përfshirjes së shtetasve shqiptarë në veprimtari të paligjshme.

Konkretisht i pandehuri Armand Tragaj, me profesion avokat, duke përdorur aplikacionin SkyECC ka komunikuar dhe ndërmarrë veprime për personat në mbrojtjen e tij ,duke ushtruar ndikim të paligjshëm ndaj funksionarëve publikë. Ai, ka konsumuar elementet e veprës penale “Ushtrimi i ndikimit të paligjshëm ndaj personave që ushtrojnë funkisone publike”, (kryer në 4 episode), parashikuar nga nenet 245/1, paragrafi 4 i Kodit Penal, si dhe në një episod ka konsumuar veprën penale të “Korrupsioni aktiv i dëshmitarit, i ekspertit ose përkthyesit” parashikuar nga neni 312 i Kodit Penal.

Në një episod tjetër, nga përgjimet, vëzhgimet në ambiente publike si dhe aktet e tjera, rezulton e provuar se i pandehuri, Edison Cukaj (Gjoka), ndonëse ishte në dijeni të faktit që nuk ishte në kushte të rregullta ligjore për kalimin e kufirit, për të lëvizur në zonën ‘’Shengen’’, ka kontaktuar dhe është ndihmuar nga të pandehurit; Ervis Deti, Serxhio Shkodra, dhe Bexhed Mema, të cilët i kanë kërkuar dhe marrë shumën prej 3 (tre) mijë euro të pandehurit me qëllim ushtrimin e ndikimit të tyre tek punonjësi i policisë kufitare i pikës së kalimit kufitar të Portit Durrës, inspektor, Naim Behluli.  Përmes ndikimit të ushtruar ndaj funksionarit publik dhe me vetëdije të plotë është realizuar kalimi i kufirit pa pengesa nga i pandehuri Edison Cukaj (Gjoka).

Hetimet vijojnë për persona të tjerë, të përfshirë në veprimtari kriminale.