Bardhi mbledh firmat, kërkon Komision Hetimor për Investimet Strategjike! I bashkohet dhe Leskaj i 'Rithemelimit'

Bardhi mbledh firmat, kërkon Komision Hetimor për Investimet Strategjike! I bashkohet dhe Leskaj i 'Rithemelimit'

Deputeti i PD-së, Gazment Bardhi

TIRANË- Pasi iu refuzua kërkesa për Komision të Posaçëm për Investimet Strategjike, me firmën e 35 deputetëve, Partia Demokratike dhe aleatët kërkojnë komision hetimor.

Në kërkesën e depozituar në Kuvend, të firmosur nga deputetët e PD, aleatët Agron Duka e Fatmir Mediu, por edhe deputeti i Rithemelimit Bujar Leskaj, thuhet se objekt i Komisionit Hetimor do të jetë shqyrtimi i të gjitha praktikave të ndjekura nga komiteti i investimeve strategjike për dhënien e statusit investitor strategjik si dhe rishikimin e ligjit për investimet strategjike, të miratuar në 28 maj të 2015, i cili sipas PD është përdorur si një mekanizëm për tu dhënë favore dhe përfitime individëve me lidhje të forta familjare me qeverinë dhe drejtuesve të Partisë Socialiste.

Sipas kërkesës së deputetëve demokratë, komisioni do të përbëhet nga 15 anëtarë, mes të cilëve kryetari dhe 6 anëtarë do të jenë të opozitës dhe 8 anëtarë të PS, veprimtaria e të cilit do të jetë 4 muaj.

Teksa njoftoi kërkesën e PD, Gazment Bardhi tha se komisioni do t'u tregojë shqiptarëve se pronat publike po ndahen tek familjarët e ministrave, tek miqtë e Edi Ramës dhe te një grusht oligarkësh pranë tij.

“Ligji për investimet strategjike u shndërrua nga Qeveria në ligj për abuzimin me pasuritë publike. Bashkë me një grup kolegësh dorëzuam sot kërkesën për ngritjen e një komisioni hetimor për të kontrolluar mënyrën e zbatimit të ligjit për investimet strategjike. Shqiptarët do të shohin sesi pronat publike po ndahen tek familjarët e ministrave, tek miqtë e Edi Ramës dhe tek një grusht oligarkësh pranë tij", shkruajti Bardhi.

Lidhur me këtë pati edhe një reagim nga vetë kryeministri Edi Rama, i cili tha se një gjë e tillë do të largonte të gjithë investitorët nga vendi.

B.K./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    A duhet të ketë një Paketë të dytë të Rezistencës Sociale?



×

Lajmi i fundit

John

Zjarret në vend, Meta: Thirrje institucioneve të marrin masa