Opozita homazh për 21 janar:
Prokuroria të zbardhë vrasjet

TIRANE- Aleatët e Partisë Socialiste do të jenë pjesë e ceremonisë homazh që do të zhvillohet të shtunën më 21 janar në kujtim të 4 demonstruesve të vrarë.

Në një takim të zhvilluar sot paradite me kryetarin e PS-së, Edi Rama në selinë rozë është rënë dakord që partitë më të mëdha të koalicionit opozitar ti bashkohen homazhe që do të mbahen të shtunën në orën 11.00 në bulevardin “Dëshmorët e Kombit”.

"Një vit më parë në 21 janar humbën jetën 4 dëshmorë, Hekuran Deda, Faik Myrtaj, Ziver Veizi e Aleks Nika të vrarë nga plumbat e qeverisë vetëm e vetëm sepse protesuan kundër pushtetit të Berishës. Kjo ngjarje e dhimbshme në historinë e vendit ka shënuar me njollë turpi demokracinë shqiptare, ndaj partitë e koalicionit opozitar kanë kërkuar që drejtësia të thotë sa më parë fjalën e saj për këtë ngjarje tragjike, ku u vranë 4 protestues paqësorë me duar në xhepa" - thuhet në njoftimin për shtyp të selisë më PS.
Takimi i Kryetarit të PS me krerët e partive aleate të PS ka zgjatur më shumë se një orë dhe më pas  koordinatori i opozitës, Preç Zogaj i bëri sot thirrje të gjithë qytetarët t'i bashkohen homazheve për të bërë të mundur nxitjen e prokurorisë për të zbardhur të vërtetën e tragjedisë.

“Ftojmë qytetarët e Tiranës dhe Shqipërisë të marrin pjesë në homazh për të nxitur prokurorinë për zbardhjen e tragjedisë, dhe shlyerjen e kësaj njolle historike për demokracinë shqiptare. Përshëndes qëndrimin e trojkës e cila me deklaratën djeshme i konsideroi të pafajshëm të vrarët. I vetmi faj i tyre ishte se morën pjesë në një demonstratë të thirur nga opozita kundër varfërisë dhe korrupsionit”- Tha Preç Zogaj menjëherë pas përfundimit të takimit që u zhvillua mes aleatëve të majtë dhe liderit të Partisë Socialiste Edi Rama.

Në takimin e zhvilluar pranë selisë PS, morën pjesë dhe drejtuesit e partive të vogla të majta Nard Ndoka, Spartak Ngjela, Petro Koçi, Skënder Gjinushi.
(sg/shqiptarja.com)