Ora 17.30 Veseli: Kuvendi do të vazhdojë seancat
Kryetari i Kuvendit të Kosovës, Kadri Veseli i bëri thirrje opozitës gjatë një konference për shtyp, për "dialog të hapur brenda institucioneve të Republikës së Kosovës, për zgjidhjen e çdo problemi”. Sipas tij veprimet e opozitës janë sa të dëmshme aq edhe të papranueshme, duke deklaruar se Kuvendi do të vazhdojë me seancat plenare. “Seancat e kuvendit do të mbahen derisa koalicioni qeveritar dhe deputet kërkojnë që të vazhdohet,” tha ai.
Sipas Veselit, opozita ende nuk e ka të qartë qëndrimin e saj ndaj republikës së Kosovës dhe flamurit shtetëror të Kosovës.
“Dua t’iu bëj një pyetje kolegëve opozitarë që nuk pranojnë dialog se cili është qëndrimi i tyre. Ne nuk po e dimë qëndrimin e opozitarëve tanë. A e njohin Republikën e Kosovës, pyesni ata cili është qëndrimi, për flamurin shtetëror. Kur kemi kaq dilema të mëdha ndaj këtyre qëndrimeve substanciale si mund të shkojmë në një proces zgjedhor që nuk do të njihet në asnjë moment," u shpreh kreu i Kuvendit të Kosovës.
Sa i përket zgjedhjes së presidentit, Veseli tha se do të jetë një proces transparent, gjithëpërfshirës dhe i bazuar në kushtetutë.
Ora 16.15 Shkon në 7 numri i deputetëve të arrestuar
Ka shkuar në 7 numri i deputetëve të opozitës që janë arrestuar. Mytaher Haskuka i Vetëvendosjes, është deputeti i radhës që është arrestuar nga Policia e Kosovës. Haskuka është arrestuar ashtu si deputetët e tjerë pasi ka hedhur gaz lotsjllës në kuvend. Më herët policia arrestoi deputetët Teuta Haxhiu, Donika Kadaj Bujupi e Pal Lekaj të AAK-së, Enver Hoti nga Nisma për Kosovën dhe Shqipe Pantina e Besa Baftiu nga Vetëvendosje.
Ora 15.30 Deputetët e opozitës qëndrojnë në hollin jashtë sallës së Kuvendit
Deputetët e Vetëvendosjes, Ardhmërisë së Kosovës dhe Nisma-s po qëndrojnë në ambientet e hollit jashtë Kuvendit, ndërkohë që deputetët e mazhorancës ndodhen në sallë. Përjashtimin nga punimet e Kuvendit, deputetët e opozitës e kanë quajtur të paligjshëm, ndërsa në mbështetje të tyre dhjetra qytetarë janë mbledhur jashtë godinës së Kuvendit. Në holl ndodhet dhe Albin Kurti, Visar Ymeri dhe Ramush Haradinaj.
Ora 15.00 Nis seanca e Kuvendit pa opozitën
Ka rinisur ashtu siç u ra dakort, seanca e kuvendit, e cila u ndërpre tri herë për shkak të hedhjes së gazit lotsjellës nga opozita. Ndërkohë kryetari i Kuvendit Kadri Veseli ka përjashtuar 23 deputetë të opozitës. Nga deputetët e opozitës në sallë është vetëm Ilir Deda i cili ka marrë fjalën i pari.