Presidenti i Republikës, Bujar Nishani me anë të një mesazhi dërguar Presidentit të Maqedonisë Gjorge Ivanov, i ka shprehur ngushëllimet për viktimat, të lënduarit dhe dëmet e shkaktuara nga shtrëngatat dhe përmbytjet në Maqedoni.

Kreu i shtetit në mesazhin e shkruar i ka siguruar mbështetjen e tij dhe të popullit shqiptar ndaj qeverisë së Maqedonisë në këto momente të vështira.
 
Mezashi i plotë i Nishanit dërguar Presidentit Ivanov:

Po i ndjek me shumë shqetësim lajmet për viktimat, të lënduarit dhe dëmet e pallogaritshme materiale nga përmbytjet e shkaktuara mbrëmë në disa prej lagjeve dhe fshatrave të Shkupit, prej shtrëngatave dhe shirave të rrëmbyer.
 
Me hidhërim të thellë u shpreh ngushëllimet më të sinqerta familjarëve të viktimave dhe të përmbyturve, Juve, qytetarëve të Shkupit e të gjithë Maqedonisë, si dhe ju siguroj se në këto momente të vështira unë dhe populli shqiptar jemi krah jush dhe Qeverisë së Maqedonisë.
 
Uroj kapërcimin sa më të shpejtë të kësaj emergjence natyrore dhe kthimin sa më parë në normalitet të jetës së qytetarëve të Shkupit e të gjithë Maqedonisë!”

Redaksia Online
XH.K/shqiptarja.com