PERMET - Skandal në Gjykatën e Përmetit. Ardian Çobo 47 vjeç i arrestuar dy ditë më parë nga Policia e Përmetit për dhunë të ushtruar ndaj 2 lojtareve të basketbollit të ekipit të Flamurtarit të Vlorës, është liruar sot në sallën e gjyqit në Gjykatën e Përmetit.

Sapo është dhënë masa e arrestit me "detyrim paraqitje" për dhunuesin e basketbollisteve femra mesditën e të dielës. Prokurorja e çështjes Silvana Pani kishte kërkuar burg pa afat ndërkohë që avokatja Minushe Çobo kërkoi lirimin e menjëhershëm të 47-vjeçarit.

Gjyqtari Pashk Gjaci mori për bazë argumentet e paraqitura nga avokatja e tw pandehurit çka dha vendimin me detyrim paraqitje. Ardian Çobo u arrestua mesditen e të dielës për dhunë të ushtruar ndaj dy lojtarëve të Flamurtarit pas takimit të basketbollit Përmeti-Flamurtari kur lojtaret e Flamurtarit debatonin në dhomat e zhveshjes me lojtaret e Përmetit ku një prej tyre ishte edhe e bija e të arrestuarit.

Prokurorja kishte ngritur tre akuza konkretisht Kundërshtimit të punonjësit të policisë së rendit publik, mosbindje ndaj urdhërit të punonjësit të policisë së rendit publik dhe dëmtime të tjera me dashje.

 

l.q/Shqiptarja.com