Përzuri gazetarin, revoltohet Unioni:
Po shkelen të drejtat e gazetarëve

TIRANE - Pas incidentit të ndodhur mes kreut të Komisionit të Ekonomisë dhe gazetarit të Top Channel ka reaguar Unioni i gazetarëve duke e quajtur arrogante dhe fyese sjelljen e deputetit Braçe kundrejt gazetarëve.

Teksa mbron të drejtat e gazetarëve, Unioni shkruan se rregulli për paraqitjen në orar të gazetarëve në komisionet parlamentare nuk është i shkruar askund dhe se përjashtimi i tyre nga salla shkel të drejtën e gazetarëvepër të marrë pjesë në Komisionet Parlamentare.

Po ashtu në deklaratën e Unionit të Gazetarëve thuhet se në Komisionin e Ekonomisë që drejton aktualisht deputeti Braçe, aplikohen standarte të dyfishta për gazetarët dhe mediat.

Reagimi i plotë i Unionit:

Unioni i Gazetarëve Shqiptarë reagon ndaj sjelljes nervoze dhe fyese të kryetarit të Komisionit të Ekonomisë, deputetit Erion Braçe ndaj gazetarit të Ekonomisë, Klodian Tomori. Në mbledhjen e djeshme të Komisionit të Ekonomisë, kolegu Tomorri u përball me një reagim nervoz dhe arrogant të deputetit drejtues të Komisionit, duke i kërkuar atij të respektojë orarin e fillimit dhe mbarimit të mbledhjes dhe duke e konsideruar lëvizjen e tij në vendin e gazetarëve në sallë si sorollatje. Drejtuesi i Komisionit shkoi edhe më tej, duke e larguar gazetarin nga salla ku zhvillohej mbledhja, gjë që bie ndesh me të drejtën e gazetarit për të ndjekur dhe pasqyruar çdo veprimtari të komisioneve parlamentare. Pretendimi i parlamentarit se në sallën e mbledhjes së Komisionit gazetarët duhet të hyjnë në orar dhe të dalin në orare të caktuara, duket i paarsye dhe nuk përfshihet në asnjë rregullore të shkruar. Madje një pretendim i tillë, bie ndesh me logjikën se si funksionon gazetaria e raportimit në mediat audiovizive. Reagimi dhe sidomos komenti publik i përcjellë nga deputeti Braçe dëshmojnë dukshëm nervozizëm dhe arrogancë, si dhe cënim të etikës së komunikimit me gazetarët dhe publikun.
Unioni i Gazetarëve Shqiptarë shpreh mbështetjen për kolegun Tomori si dhe i bashkohet kritikës së tij se në Komisionin e Ekonomisë që drejton aktualisht deputeti Braçe, aplikohen standarte të dyfishta për gazetarët dhe mediat.

Zyra e Shtypit
Unioni i Gazetarëve Shqiptarë

Redaksia online
(f.m/shqiptarja.com)