Rimsha e mbuluar me një shami të gjelbër është nxjerrë nga burgu në Rawalpindi e shoqëruar nga forca të shumta të sigurisë. Një helikopter e ka marrë adoleshenten ndërsa nuk ka të dhëna se cili ishte itenerari i lëvizjes.
Një përfaqësues i familjes shoqëroi babain e vajzës deri në burg ndërsa një takim i tillë nuk kishte ndodhur që prej gushtit kur Rimsha u arrestua nga policia nën akuzën e djegies së fletëve të librit të shenjtë, Kuranit. CNN raporton se në momentin e takimit me të atin vajza ka nisur të qajë duke pyetur se çfarë po ndodhte me të.
Një familjar i vajzës tha se tanimë Kanadaja, Italia dhe Shtetet e Bashkuara i kanë ofruar mundësi strehimi Rimshas dhe familjes së saj por dëshira e tyre mbetet të qëndrojnë në Pakistan.
Avokati i vajzës tha në gjykatë se ajo duhet të cilësohet e pafajshme për shkak të moshës dhe nivelit të ulët të inteligjencës.
(dm/Gre.M/Shqiptarja.com)