PAKISTAN - Sipas ushtrisë së Pakistanit gjatë ditës së sotme janë vrarë 23 militantë islamikë në rajonin Vaziristani Verior, përgjatë kufirit me Afganistanin, ndërkohë që forcat qeveritare vijojnë ofensivën e tyre për ta pastruar këtë territor nga luftëtarët talibanë dhe aleatët e tyre të jashtëm.

Ushtria pakistaneze është shprehur sot se “nga sulmet me helikopter kundër bazave të kryengritësve në malet Zartantagi janë vrarë 15 militantë dhe është shkatërruar një qendër terroriste  e komunikimit”.

Në deklaratën e ushtrisë theksohet se në një sulm tjetër, forcat qeveritare kanë vrarë 8 militantë uzbekë pranë Miranshahit, që është kryeqytet i Vaziristanit Verior.

Nga fillimi i operacionit, më 15 qershor, ushtria e Pakistanit pretendon se ka vrarë mbi 200 militantë në këtë rajon.

Vlerësohet se më se 100 mijë banorë janë larguar nga ky territor prej se kishin filluar bombardimet e para, muajin e kaluar, ndërsa mijëra familje kanë kaluar në Afganistan.
 
 
Redaksia Online
(a.h/shqiptarja.com)