Papa kundër përdorimit të fesë për të justifikuar luftën në Kongresin në Kazakistan, Patriarku Kirill mungon në mbledhje

Papa Françesku paralajmëroi liderët fetarë nga besime të ndryshme se feja nuk mund të përdoret për të justifikuar “ligësinë” e luftës. Kjo deklaratë interpretohet si kritikë ndaj Kishës Ortodokse Ruse, e cila me në krye Patriarkun Kirill ka mbështetur presidentin rus, Vladimir Putin për luftën në Ukrainë.

Duke folur në Kongresin e shtatë të Liderëve të Botës dhe Feve Tradicionale, që u mbajt në Kazakistan, Françesku ftoi të pranishmit që të bashkohen në dënimin e luftës dhe të mospërdorimit të fesë si justifikim për të.

“Zoti është paqe. Ai na udhëheq gjithmonë në rrugën e paqes, asnjëherë në atë të luftës”, tha Papa Françesku pa përmendur në mënyrë specifike Rusinë apo Ukrainën.

LEXO EDHE:
Kremlini paralajmëron Londrën për kundërpërgjigje nëse Ukraina përdor armët britanike për të sulmuar territorin rus

“Nëse krijuesi, të cilit ne ia dedikojmë jetën, është autor i jetës njerëzore, si mund ne që e quajmë veten besimtar, të pranojmë shkatërrimin e asaj jete? Do Zoti që ne kurrë të mos e justifikojmë dhunën”, tha Papa.

Patriarku Kirill ishte parashikuar të merrte pjesë në këtë konferencë, por e anuloi pjesëmarrjen në momentet e fundit. Megjithatë, një delegacion i Kishës Ortodokse Rusie mori pjesë në ngjarje.

Patriarku rus Kirill ka dërguar një mesazh për Kongresin, që u lexua gjatë mbledhjes. Ai paralajmëroi për problemet që po shkaktohen “nga përpjekjet për të ndërtuar një botë pa u mbështetur në vlera morale”.

Patriarku rus kritikoi mentalitetin “sekular” të Perëndimit dhe tha se konflikti në Ukrainë është mbjellë nga kërcënimet e jashtme ndaj Rusisë. Kongresi në Nur-Sultan të Kazakistanit mbledh së bashku delegacione të besimeve të ndryshme për të diskutuar për rolin e fesë në zhvillimin e njerëzimit në botën moderne.

D.GJ/Shqiptarja.com

TAG:
• papa Francesku
• lufta ne ukraine