Papa Leone XIV u ul në kabinën e pilotit gjatë një fluturimi nga Madridi në Barcelonë ndërsa vijon turneun e tij në Spanjë. Ati i Shenjtë u ftua në kabinë nga njëri prej kapitenëve dhe përshëndeti me dorë pilotët e avionëve luftarakë të Forcave Ajrore Spanjolle që po shoqëronin avionin.

Në momentin kur mbërriti në Barcelonë, ai foli në gjuhën katalanase.

Ashtu si në Madrid, ku ai hapi vizitën e parë të një pape në Spanjë pas 15 vitesh, Ati i Shenjtë u prit nga turma të mëdha njerëzish kur mbërriti në katedralen e Barcelonës, e ndërtuar në shekullin XIV, për të drejtuar lutjen e mesditës. Mijëra persona u grumbulluan pas barrierave jashtë kishës nën rrezet e diellit, duke valëvitur flamuj dhe duke bërtitur: “Rroftë Papa!”.

“Estimats germans i germanes” (“Të dashur vëllezër dhe motra”), kështu e nisi Papa lutjen e tij në gjuhën katalanase, duke vënë në pah karakterin e veçantë kulturor dhe politik të rajonit.

Kjo gjuhë, thelbësore për identitetin e rajonit, përdoret gjerësisht në shkolla, kisha dhe në jetën politike vendore.

Në ndalesën e së hënës në Madrid, Papa Leone u takua në stadiumin Bernabeu me Bad Bunny-n, i cili ndodhet në mes të turneut të tij.

Vatikani ka deklaruar se nuk do të publikohen fotografi nga takimi ku ishin të pranishëm edhe familjarë të këngëtarit. Sipas deklaratës, papa u përcolli atyre një përshëndetje të shkurtër përpara se të largohej nga stadiumi.

Ashtu si Papa, edhe reperi ka kritikuar haptazi për politikat e ashpra të presidentit amerikan Donald Trump.

Bad Bunny ishte artisti kryesor i koncertit të Super Bowl në muajin shkurt, duke sjellë gjuhën spanjolle dhe ritmet e reggaeton-it në spektaklin vjetor të futbollit amerikan në Shtetet e Bashkuara. Donald Trump e cilësoi “absolutisht të tmerrshme” dhe “fyerje ndaj madhështisë së Amerikës”.