Para Kongresit të PS, Rama
e Blushi në bazën socialiste

TIRANË - Edi Rama dhe Ben Blushi, njëri kryetar i Partisë Socialiste, e tjetri një deputet që pretendon të bëhet kryetar, kanë nisur turet me bazën socialiste, kur Kongresi i partisë është vetëm një muaj larg. Rama, njëkohësisht kryeministër i vendit, është duke zhvilluar një tur takimesh me bazën, ku po merr pjesë në procesin e zgjerimit dhe anëtarësimeve të reja në PS. Ai ishte dje në Durrës, ku së bashku me koordinatorin e rajonit, Sajmir Tahiri, tha se PS po bën shtetin që duhet. “Të gjitha këto që ne kemi arritur nuk janë arsye për të thënë se në dy vjet e gjysmë, ne e bëmë natën, ditë, e bëmë ferrin, parajsë dhe tani e kthyem Shqipërinë në oazin e lulëzimit ekonomik dhe social, por janë arsye të mjaftueshme për të thënë se ne po bëjmë shtetin që na duhet, për të ndërtuar shoqërinë, ekonominë dhe bashkëjetesën që na duhet.