Alibeaj me deputetët që e rikonfirmuan kryetar grupi: Nesër çojmë në ‘Kushtetuese’ bordin e naftës! Forcojmë raportin me SHBA e Britaninë! Opozita e çoroditur, 3 prioritetet tona

Enkelejd Alibeaj ka komentuar shifrën e deputetëve (16) që i janë bashkuar në mbledhjen që mbajti ditën e sotme duke thënë se nuk do të flasë për numra pasi sipas tij, kjo i shërben vetëm Edi Ramës.

“Dua të shkëputem nga shifrat. Ne duhet të bëjmë opozitë reale duke pikasur e identifikuar çështjet që preukopojnë sot shqiptarin pa punë, pa siguri, pa shpresë, kjo është mënyra. Teknikalitetet se janë konsumuar, mund t'ju them që në takimet që kemi pasur, janë konsultuar, edhe sot madje, këtu apo online s'ka rëndësi. E rëndësishme është cilësia e këtyre prioriteteve. Këtë do të bëjë Edi Rama, kurthin e numrave”, tha Alibeaj.

Enkelejd Alibeaj nuk ka dhënë asnjë përgjigje nëse ka tentuar të komunikojë me deputetët që mbështesin Sali Berishën në mënyrë që të kenë të njëjtat prioritete në sesionin e ri parlamentar. Pyetjes të gazetares së Report Tv, Danjela Maloku, iu përgjigj duke thënë se ka përshtypjen se nuk ka ndasi mes deputetëve kur flitet për prioritetet e opozitës.

“Ajo çfarë u deklarua këtu ishin prioritetet parlamentare për veprimtarinë e grupit parlamentar të PD. Nuk dua të mbetem pas me të shkuarën. Çoroditja e opozitës ia ka bërë të lehtë Edi Ramës të bëjë përshesh. Sot duhet të kalojmë në akte e veprime konkrete. Tani janë këto prioritete. Për ne që kemi rënë dakord për këtë çështje, ajo çfarë na bën bashkë janë këto çështje. Kam përshtypjen që për këto, nuk ka asnjë lloj ndasie mes nesh”, tha Alibeaj.

Kreu i grupit të PD-së, Enkelejd Alibeaj ka bërë me dije se nesër çdo të çojnë në Gjykatën Kushtetuese kërkesën për shfuqizimin si antikushtetues të dy ligjeve mbi bazën e të cilave funksionon Bordi i paracaktimit të cmimit të naftës, benzinës dhe gazit.

“Për këtë arsye, dua të informoj opinionin publik se Grupi Parlamentar i Partisë Demokratike, ka përgatitur dhe ditën e nesërme do të depozitojë në Gjykatën Kushtetuese, kërkesën për shfuqizimin si antikushtetues të dy ligjeve mbi bazën e të cilave funksionon Bordi i paracaktimit të cmimit të naftës, benzinës dhe gazit”, tha Alibeaj.

Deputeti i PD, Enkelejd Alibeaj ka sqaruar se një tjetër prioritet i PD do të jenë Reformat Antikorrupsion dhe luftën ndaj Krimit të Organizuar. Alibeaj shtoi se Rama përfitoi nga çoroditja e PD, dhe mbajti në sirtar paketën për kontrollin e pastërtisë së figurës.

“Rreziku permanent në 32 vite poskomunizëm në Shqipëri është korrupsioni dhe krimi i organizuar. Është korrupsioni që ka bllokuar zhvillimin ekonomik të vendit. Është korrupsioni dhe krimi i organizuar që ka bllokuar integrimin europian të Shqipërisë. Është korrupsioni dhe krimi i organizuar që rrezikon sigurinë kombëtare të vendit. Është korrupsioni dhe krimi i organizuar që mban ende në këmbë sistemin e kalbur të tranzicionit shqiptar. Prej kohësh raportet ndërkombëtare flasin në një zë se vendi jonë është më i korruptuari në Rajon dhe Europë dhe reklama e vetme për Shqipërinë mbetet fuqizimi i krimit të organizuar.

1 vit më parë Grupi Parlamentar i Partisë Demokratike ka propozuar një paketë të plotë për kontrollin e pastërtisë së figurës dhe integritetit të zyrtarëve të lart. Duke përfituar edhe nga çoroditja e opozitës, Edi Rama e ka mbyllur atë në syrtar, duke mos lejuar avancimin e kësaj reforme të shumëpritur nga qytetarët.

Etja për pushtet e pasuri e 250 shqiptarëve, që përbëjnë edhe rrethin e zyrtarëve të lart të shtetit, nuk mund të mbajë peng të ardhmen e 3 milion shqiptarëve të tjerë. Interesi dhe rehatija e 250 shqiptarëve, nuk mund të lë pa shprese e besim 3 milion shqiptarë të tjerë. Korrupsioni nuk është retorikë boshe e politikës që e sjell në vëmeëndje të publikut sa herë lufta politike e ditës ia kërkon. Korrupsioni nënkupton pasurim të paligjshëm të 250 zyrtarëve të lart, korrupsioni përkthehet në jetë luksi të 250 zyrtarëve të lart, korrupsioni shfaqet në pasuritë e pajustifikuara dhe të fshehura të 250 zyrtarëve të lart, korrupsioni vërehet tek lidhjet e politikës me krimin e organizuar. Për pasojë luftohet, jo përmes retorikës boshe dhe sulmit ndaj institucioneve të drejtësisë, por duke i ngarkuar me ligj organet e drejtësisë, duke i vënë në dispozicion mekanizimin e duhur ligjor, që ti japin fund etjes për pushtet dhe pasurim të paligjshëm të 250 zyrtarëve të lart.

Shqipëria ka nevojë emergjentë për drejtësi, shqiptarët janë të etur për llogaridhënie. Pandëshkueshmëria, paprekshmëria e qeveritarëve, zyrtarëve të lart, bizneseve pranë tyre dhe krimit të organizuar janë arsyeja e vetme pse shqiptarët sot kanë humbur shpresën dhe besimin. Tanimë është koha që SPAK të veprojë dhe të mos ketë më asnjë alibi. Ne do të mbështesim cdo propozim që e forcon SPAK, që con përpara zbatimin e Reformës në Drejtësi dhe shmang kapjen politike të drejtësisë”, tha Alibeaj.

Në mbledhjen me deputetët që e kanë rifonfirmuar si kryetar grupi, Enkelejd Alibeaj nuk ka lënë pa dërguar sinjale për PD-në e Berishës. Ai tha se kjo forcë politike do të vijojë që të ketë si qëllim kryesor forcimin e marrëdhënieve me SHBA. Sipas tij, nëse PD-ja do të përplaset me aleatin më të madh të shqiptarëve, atëherë do të vuloste regjimin e Ramës.

“Proçesi integrimit ka kaluar në një tjetër fazë dhe do të duhet një kontroll më serioz dhe i saktë nga ana e Kuvendit. Ndaj do të ngremë një grup pune dhe propozime konkrete nga ekspertët për të ecur me ritmet e duhura në procesin e integrimit europian. Integrimi europian është prioritet kombëtar, dhe për të cilin duhet të punojmë çdo ditë, për ta çuar përpara dhe për të qenë sa më parë pjesë e familjes europiane.

Njëkohësisht do të angazhohemi në ndihmën për Kosovën dhe futjen e saj në institucionet ndërkombëtare, si dhe stabilitetin në Rajon, një proces që duhet të koordinohet jo vetëm në mënyrë bipartiake, gjithëpërfshirëse, por vecanërisht në bashkëpunim të ngushtë me institucionet e Republikës së Kosovës dhe partnerët tanë ndërkombëtarë.

Ruajtja dhe forcimi i partneritetit strategjik me SHBA, Bashkimin Europian dhe Britaninë e Madhe, për Grupin Parlamentar të PD është prioritet në mbrojtje të interesit tonë kombëtar. Vendosja në një kurs përplasje të Partisë Demokratike dhe grupit të saj parlamentar me SHBA, BE dhe Britaninë e Madhe, nuk do të ishte vetëm devijim nga misioni properëndimor i Partisë Demokratike që nga krijimi, por edhe një rrugë e sigurt për të cimentuar regjimin antidemokratik dhe antiperëndimor të Edi Ramës”, tha Alibeaj.

Kreu i grupit të PD-së, Enkelejd Alibeaj tregon prioritet e aksionin të tyre opozitar.

“Ne ishim në një konflikt me vetën që sh fokusoi aksionin opozitar është momenti që të fokusohemi vetëm te problemet e qytetarëve, zgjidhja është rruga për t’i bindur shqiptarët që zgjidhja jonë është e duhur, arroganca e qeverisë mposhtet me ofertë, jo retorikë boshe, me distancimi real, jo me selektivitetin dhe lojëra interesash, propozoj prioritetet tona, në 3 shtylla kryesore, reforma legjislative, mbrojtja e qytetarëve, kontrolli parlamentar. I pari është reforma zgjedhore dhe territoriale, prioritet mbyllja e këtyre 2 reformave. Janë thelbësore për mbrojtjen e interesave. E dyta, dekomunistizimi i shoqërisë.

16 deputetë i janë përgjigjur kërkesës së Enkelejd Alibeaj për të zhvilluar mbledhje në Kryesinë e Kuvendit vetëm pak orë para nisjes së seancës plenare.

1. 1-Zheni Gjergji
2. 2-Dhurata Çupi
3. 3-Arbi Agalliu
4. 4-Saimir Korreshi
5. 5-Gazment Bardhi
6. 6-Dashnor Sula
7. 7-Flutura Acka
8. 8-Selaudin Jakupllari
9. 9-Enkelejd Alibeaj
10. 10-Kreshnik Çollaku
11. 11-Andia Ulliri
12. 12-Flamur Hoxha
13. 13-Eralda Tase Bane
14. 14-Agron Gjekmarkaj
15. 15-Helidon Bushati
16. 16-Bledjon Nallbati