Partia Demokratike tenton të hapë
lojën e çertifikatave të sigurisë

TIRANE- Komisioni për hetimin e lëvizjeve në polici u përfshi dje nga debati i radhës ku Partia Demokratike, nëpërmjet deputetit Flamur Noka, kërkoi që të hapte një lojë me certifikatat e sigurisë. Konkretisht, Noka theksoi se komisionit duhet t’i paraqiten të gjitha të dhënat për disponimin e certifikatave të sigurisë nga ana e të gjithë drejtuesve të lartë të policisë së shtetit, kërkesë kjo e njëjtë me atë që ka bërë Partia Socialiste gjatë mbledhjes së Komisionit të Sigurisë, kur i pranishëm ishte kreu i SHISH, Visho Ajazi Lika.

“Propozoj që në rendin e ditës të futet edhe informacioni i DSIK-së për pajisjen e krerëve të lartë të Policisë së Shtetit me certifikatë sigurie”,- tha deputeti Noka. Por kjo kërkesë e tij hasi në një kundërshtim nga ana e deputeti Balla i cili theksoi se nëse kjo pikë duhet të futet në rendin e ditës, atëherë Noka duhet ta paraqesë me shkrim këtë kërkesë.
Por krahas kësaj, mbledhja u karakterizua edhe nga një debat ndërmjet mazhorancës dhe opozitës.

Nga kampi socialist ishte deputeti Paulin Stërkaj, i cili theksoi se puna e Komisionit Hetimor kishte ngecur për shkak se kreu i këtij komisioni, Arben Ristani, nuk ka këmbëngulur që të vijojë puna normalisht. “Lëvizjet janë bërë për 6 muaj dhe nuk mund të shihen të gjitha këto shkresa për 6 ditë. Ju nuk duhej ta linit 13 ditë, por ditën e 7-të duhej ta mblidhnit komisionin. Në këtë mënyrë duket sikur ju doni me e fut në grackë”, tha deputeti Sterkaj. Por nga ana e tij, kreu i këtij komisioni, deputeti i PD-së, Arben Ristani, theksoi se puna kishte ngecur pasi Ministria e Brendshme dhe Policia e Shtetit nuk kishte paraqitur të gjitha dosjet që ishin kërkuar nga komisioni.

Konkretisht deri tani, në Komisionin Hetimor janë paraqitur 384 dosje në të cilat përfshihen policët e liruar nga detyra. Nga kjo mori spunto edhe deputeti i PD-së, Eduard Halimi për të akuzuar strukturat e Ministrisë së Brendshme. Konkretisht, Halimi theksoi se është e jashtëlogjikshme që dosjet e policëve që janë liruar, që kanë me vite në Polici, të gjenden përpara atyre personave që janë emëruar kohët e fundit.

Në fund të mbledhjes ra konsensusi ndërmjet dy palëve që mbledhja të shtyhet dhe deputetët e Komisionit Hetimor të mblidhen më shpejt në mënyrë që të përshpejtohet puna hetimore për lëvizjet e bëra në strukturat e Policisë së Shtetit.

Shkrimi u publikua sot (19.03.2014) në gazetën Shqiptarja.com (print)

Redaksia Online
(d.d/shqiptarja.com)

/Shqiptarja.com

TAG:
• visho ajazi lika