Partizani largon Do Karmo-n, prish
kontratën me brazilianin
 

Ekipi i Partizanit ka ndërprerë marrëveshjen me sulmuesin brazilian, Do Karmo, duke njoftuar se tashmë ai është i lirë për të kaluar me të tjera skuadra.

Njoftimi i të kuqve vjen pak ditë para sfidës në transfertë ndaj Teutës. “Sulmuesi brazilian Do Carmo ka ndërprerë aventurën me të kuqtë , teksa ka arritur marrëveshjen me klubin për të qenë Lojtar i lirë”,njofton Partizani.

Braziliani që më parë ka qenë pjesë e Asteras Tripoli në Greqi dhe Lokomotiv Plovdiv në Bullgari nuk arriti të bindë stafin teknik. Ai u aktivizua në ndeshjen ndaj Bylis për 24 minuta pa lënë ndonjë shenjë, ndërsa është aktivizuar edhe me ekipin e dytë. Krisja mes tij e klubit nisi pikërisht në sfidën e së dielës Partizani B – Tirana B dhe largimi i braziljanit ishte i paralajmëruar. Gjetja e gjuhës së përbashkët ka bërë që tashmë lojtari të tërheqë dokumentacionin e tij nga klubi e të jetë lojtar i lirë. Pas “bombës” së merkatos, argjentinasit Haberkorn, ky është largimi i dytë nga Partizani

Mazrekaj e Racic mungesat me Teutën

Skuadra e Partizanit ka kryer sot në "Qendrën Stërvitore të Ekipeve Kombëtare” në Kamëz, përgatitjet në prag të takimit të radhës ndaj Teutës. Grupi i lojtarëve ka zhvilluar në orën 14:30 një seancë të karakterit tekniko-taktik, ku traineri Agostinelli ka zhvilluar edhe një ndeshje kontrolli. Me ekipin sot nuk janë stërvitur Mazrekaj dhe Raçiç që është skualifikuar për takimin ndaj Teutës. Përgatitjet do të vijojnë të premten me seancën e radhës. Aktualisht, Partizani mbetet në vendin e dytë të klasifikimit me 4 pikë më pak se Skënderbeu kryesues dhe sfida e radhës ndaj Teutës mbetet jetike në betejën për titullin pasi edhe ekipi i Gugash Maganit ka objektiv vendin e tretë për të siguruar një biletë për në Europë.

Redaksia Online                                        
(m.b/Shqiptarja.Com)