TIRANE - Urimit të besimtarëve të krishterë në festën e Pashkëve u është bashkuar edhe kreu i opozitës dhe njëkohësisht kreu i Bashkisë Lulzim Basha.
 
Në urimin e tij Basha falenderoi të famullitarët dhe pastorët për punën e tyre në kujdes të qytetarëve, ndërsa uroi për më shumë dhembshuri e solidaritet për një të ardhme më të mirë.
 
"Në këtë ditë festimi dua të uroj të gjithë besimtarët e krishterë, Gëzuar Pashkët. Mirësi dhe mbarësi sjelltë Zoti për ju dhe familjet tuaja. Faleminderit nga zemra të gjithë famullitarëve, pastorëve për punën e palodhur në kujdes të qytetarëve. Më shumë përgjegjshmëri, dhembshuri dhe solidaritet që të gjithë të punojmë për një të ardhme më të mirë, një të nesërme më të mirë se kjo e sotmja." uroi Basha.

basha ortodokset
(Në foto: Kreu i opozitës Lulzim Basha dhe Kreu i Kishës Ortodokse Kryepeshkopin Anastas Janullatos)

Në fjalën e tij Basha u ndal edhe tek mbajtja e flamurit shqiptar nga Papa Françesku gjatë kremtimit të Ringjalljes së Krishtit, duke e cilësuar këtë si një dhuratë për shqiptarët pët kontributin e dhënë nga katolikët shqiptarë ndër vite.

"Jam shumë i lumtur që në këtë Pashkë, besimtarët katolikë morën një dhuratë kaq të bukur, shqiptarët morën një dhuratë kaq të bukur me xhestin kuptimplotë të Papës Francesku i cili hodhi mbi supe flamurin arbëror të Gjergj Kastriot Skënderbeut, flamurin shqiptar, duke vlerësuar kontributet e jashtëzakonshme të të krishterëve shqiptarë, të Klerit shqiptar të martirizuar ndër shekuj e në veçanti gjatë periudhës së ndalimit kriminal të besimit fetar në Shqipëri, të regjimit komunist, duke nderuar kontributin e shenjtëve të Kishës Katolike, të Nënë Terezës por gjithashtu kontributin e heshtur të dhjetëra e qindra famullitarëve, priftërinjve, klerikëve që u shërbejnë besimtarëve të krishterë, i shërbejnë Kishës, i shërbejnë shoqërisë, u shërbejnë të paprivilegjuarve." u shpreh Lulzim Basha

Më poshtë fjala e plotë e Lulzim Bashës gjatë urimit të tij:

Urimi i kryebashkiakut, njëherësh kryetar i PD, Lulzim Basha për besimtarët katolikë:
 
“Të gjithë besimtarëve katolikë u uroj nga zemra “Gëzuar Pashkët!”. Jam shumë i lumtur që në këtë Pashkë, besimtarët katolikë morën një dhuratë kaq të bukur, shqiptarët morën një dhuratë kaq të bukur me xhestin kuptimplotë të Papës Francesku i cili hodhi mbi supe flamurin arbëror të Gjergj Kastriot Skënderbeut, flamurin shqiptar, duke vlerësuar kontributet e jashtëzakonshme të të krishterëve shqiptarë, të Klerit shqiptar të martirizuar ndër shekuj e në veçanti gjatë periudhës së ndalimit kriminal të besimit fetar në Shqipëri, të regjimit komunist, duke nderuar kontributin e shenjtëve të Kishës Katolike, të Nënë Terezës por gjithashtu kontributin e heshtur të dhjetëra e qindra famullitarëve, priftërinjve, klerikëve që u shërbejnë besimtarëve të krishterë, i shërbejnë Kishës, i shërbejnë shoqërisë, u shërbejnë të paprivilegjuarve.
 
Falënderimet e mia shkojnë për të gjithë ata që me përkushtim e përgjegjësi bëjnë të mundur që në ditë si kjo e ringjalljes së shpresës, t’u ringjallin sa më shumë shpresën dhe besimin njerëzve në nevojë dhe gjithë shoqërisë se e nesërmja do të jetë më e mirë se e sotmja. Gëzuar Pashkët!”
 
Urimi i kryebashkiakut, njëherësh kryetar i PD, Lulzim Basha për besimtarët ortodoksë:
 
“Në këtë ditë kremtimi të ringjalljes hyjnore, dua t’u uroj të gjithë besimtarëve të krishterë, vëllezërve e motrave tona, anembanë Shqipërisë dhe trojeve shqiptare: “Gëzuar Pashkët, mirësi e mbarësi sjelltë Zoti për ju dhe familjet tuaja!”.
 
Dua të falënderoj nga zemra të gjithë famullitarët, priftërinjtë, pastorët për përkushtimin dhe dashurinë me të cilën i shërbejnë besimtarëve, i shërbejnë Kishës dhe Zotit.
 
Dua të përfitoj nga ky rast, të bëj thirrje për më shumë përgjegjshmëri, më shumë dhembshuri, më shumë solidaritet mes të gjithëve nesh, në mënyrë që të gjithë të punojmë për një të ardhme më të mirë, për një të nesërme më të mirë se e sotmja, që është edhe mesazhi i shpresës dhe besimit të Pashkëve. Gëzuar!”


Redaksia Online
(e.c/shqiptarja.com)