Në një deklaratë për mediat deputeti demokrat Edmond Spaho tha se Operatori i Shperndarjes se Energjise Elektrike ka dhënë miliona për deputetët socialistë dhe të LSI-së.
Nga selia blu Spaho nënvizoi se firma që ka përfituar tenderin për rikonstruksionin e zyrave të OSHEE ka ndërtuar me kosto 4 herë më të lartë nga miku i Edi Ramës.
Deputeti Spaho vijoi akuzën edhe ndaj ministrit të Shëndetësisë Ilir Beqaj i cili sipas tij ka krijuar kushte për favorizim ndaj kompanisë Intech plus, ku ka qene bashkethemelues para se te vihej ne krye te Shendetesise shqiptare.
Deklarata e plotë e PD-së:
Milionat që OSHE ka dhënë për deputetë të Edi Ramës, kandidatë për kryetarë bashkie apo donator të Partisë Socialiste apo LSI-së, kryesisht janë ndarë me negociim pa shpallje gare. Me porosi; hajde dhe merr nga thesi ca miliona.
Kështu ka funksionuar për dy vite OSHE-ja, e cila shperdoron milionat e gjakut të shqiptarëve, paratë qe i ka mbledhur me dhunë, me forcë, me burg.
Majmen njerëzit e Edi Ramës me paratë që u morën jetën Qamil Zelës, Llazi Nasit, Gjovalin Lazrit, Arif Dodës.
Bëjnë pasuri me këto miliona deputetë dhe klientela e Edi Ramës, teksa lihen në errësirë fëmijë të porsalindur, pleq të vetmuar, dhe çohen në burg njerëzit e pamundur.
Për çfarë duheshin marrë me dhunë këto para kur nuk investohet ne përmirësimin e furnizimit me energji e evidentuar tek hidrovorët që nuk punonin gjatë përmbytjeve apo tek ndërprerja e vazhdueshme e dritave kudo në vend. Këto para u duheshin marrë me dhunë qytetarëve që ndërtuesi i sarajeve të Edi Ramës të kapte 5 miliardë lekë për rikonstruksion zyrash. Sipas llogarive të bëra, ndërtuesit të Ramës i janë dhënë para për të bërë punime rregulluese që shkojnë 1639 euro metri katorë. Ndërkohë që për të ndërtuar një godinë të re kostoja është 4 herë më e vogël.
Këto para u duheshin marrë me dhunë qytetarëve që të merrte pa tender Safet-kandidati i Edi Ramës në Kamëz, 850 milionë lekë për shërbimin e ruajtjes dhe sigurisë fizike sikurse mori edhe kompania e Pjerin Ndreut, 340 milionë lekë.
Kur ndahet torta nuk mungon i kudondodhuri i korrupsionit, Ilir Beqa, me kompaninë e tij Intech plus, që ngjeu lugën edhe me paratë e OSHE-së. 970 milionë lekë ka përfituar Sadri Abazi, një tjetër kanakar i Edi Ramës. Një lukuni donatorësh, deputetësh, miqsh të Edi Ramës janë sulur e kanë mbushur xhepat me paratë e shqiptarëve, pa tender, pa garë, me negociim nëse ju mjaftojne për tu ngopur ose jo.Si hienat merr, shqyej, mbush trastën e ik. Kjo është banda e OSHE, këto janë arritjet e mëdha të Edi Ramës. Një korrupsion i pamasë e i pështirë qe tallet me skamjen dhe me jetën e qytetarëve të vendit.
Eshtë koha për t’i ndalur zullumqarët e zhytur në vjedhje e zhvatje.
Redaksia online
(o.m/shqiptarja.com)