PD: Gregu me syze 60 mijë euro
me se i ka blerë, kush ia ka dhuruar?

Kryetari i Forumit Rinor të Partisë Demokratike, Belind Këlliçi në një deklaratë për mediat ka deklaruar se, djali i Kryeministrit Edi Rama, Gregori, është fotografuar teksa mban syze me një vlerë prej 60 mijë euro, për të cilat ai duhet që të tregojë burimin e parave, me të cilat i ka blerë, ose të tregojë se kush i’a ka bërë dhuratë.

Këlliçi ka shtuar se Gregor Rama është i papunë dhe duhet të justifikojë vlerën me të cilën ka blerë këto syze, që sipas tij janë syze tipike të oligarkëve të lindjes, të qeveritarëve të korruptuar, të njohur botërisht për pasurinë e luksin që kanë vënë në kurriz të popullit.

Ndaj, sipas Këlliçit, Gregor Rama duhet të përgjigjet se nga i ka blerë apo marrë dhuratë këto syze.

Ja deklarata e tij e plotë
Media ka zbuluar se studenti më i pasur në vend, dhe ndoshta në rajon, është i papuni Gregor Rama, djali i kryeministrit.
Zbulimi nuk ka qënë shumë i vështirë për t’u bërë, pasi Gregu, studenti i papunë, është pjesë e arrogancës rilindase që ka dëshirë ta tregojë luksin, edhe pse shokët e tij të klasës nuk kanë lekë të pinë një kafe, le më të pagujnë tarifat e rritura të universiteteve nga babai tij, edhe pse 46.2 përqind e familjeve shqiptare jetojnë në varfëri me 5 dollarë në ditë.
Syzet që mban djali i papunë i Edi Ramës, janë Maybach që sipas medias dhe ekspertëve kushtojnë të paktën 60 mijë euro.
Syze tipike të oligarkëve të lindjes, të qeveritarëve të korruptuar, të njohur botërisht për pasurinë e luksin që kanë vënë në kurriz të popullit.
Vlera e këtyre syzeve që mban Gregu është sa dy muaj pagë e presidentit amerikan, Obama.
Përveçse një çështje morale, që tregon harbutërinë e rilindjes, kontrastin e thellë mes Edi Ramës, njerëzve të tij, dhe popullit që nuk ka me se të ushqehet, ky është dhe një problem i mprehtë ligjor.
Djali i kryeministrit, duhet të tregojë se ku i ka marrë paratë për të pasur një palë syze 60 mijë euroshe. Të tregojë burimin e parave. Eshtë i detyruar me ligj.
Nëse i ka dhuratë, duhet të tregojë se nga kush i ka dhuratë;
Nga hakmarrja për drejtësi?
Nga Emiliano Shullazi?
Apo nga kompania kineze që po përgaditet të marrë koncesionin e TVSH, sëbashku me xhaxhain e tij Olsin?
Këto pyetje janë shqetësim publik, dhe Gregor Edi Rama është i detyruar të japë përgjigje.

Redaksia Online
(F.T/shqiptarja.com)