Partia Demokratike ka akuzuar sot kryeministrin Edi Rama se vazhdon të mbrojë Klement Balilin, ish drejtorin e transporteve në Sarandë të akuzuar nga drejtësia greke si kreu i një rrjeti të trafikut të drogës.

PD publikoi sot disa fotografi ku pretendon se tregon 46 vjeçarin ndërsa është duke pushuar në një kompleks turistik në Sarandë. Sipas PD, fotot janë bërë nga qytetarët dhe Balili duket mbi një skaf, ndërsa mban një kapele në kokë.

“Ky fakt dëshmon se Edi Rama jo vetëm i siguroi arratinë dhe shpëtimin prej aksionit ndërkombëtar të DEA-s amerikane, policisë greke dhe belge, por po i ofron edhe më shumë garanci e paprekshmëri që ai të bëjë dhe pushime pa i hyrë ferrë në këmbë”-thuhet në deklaratën e PD.

Pamjet nuk janë të qarta nëse bëhet fjalë vërtetë për të kërkuarin e autoriteteve greke për trafik droge. Po sipas PD, Balili ka qenë në shoqërinë e zv/drejtorit të Përgjithshëm të policisë Rebani Jaupaj.

“Kryeministri Edi Rama tu shpjegojë qytetarëve se pse Zëvendësdrejtori i Përgjithshëm i Policisë së Shtetit, Rebani Jaupaj ndodhej në resortin turistik ku po pushonte i këkuari ndërkombëtar për trafik droge, Eskobari i Ballkanit, Klement Balilaj”-shprehet PD. Klement Balili rezulton i zhdukur që prej 17 majit të këtij viti, pasi Interpol Athina lëshoi urdhëarrestin, pasi akuzohet nga autoritetet greke për trafik droge. 
klement balili
klement balili
(PD: Mbi skaf, Klement Balili)

Deklarata e plotë e PD:
"Dëshmi nga vendngjarja konfirmojnë se sot në mesditë, në kompleksin Sejko në Sarandë është shfaqur Klement Balili, i shpallur në kërkim ndërkombëtar për trafik droge. Bashkangjitur janë fotot ku Klement Balili shfaqet mbi një skaf, duke shijuar ditët e nxehta në det.
Ky fakt dëshmon se Edi Rama jo vetëm i siguroi arratinë dhe shpëtimin prej aksionit ndërkombëtar të DEA-s amerikane, policisë greke dhe belge, por po i ofron edhe më shumë garanci e paprekshmëri që ai të bëjë dhe pushime pa i hyrë ferrë në këmbë.
Dëshmitë nga vendngjarja konfirmojnë gjithashtu se Eskobari i Ballkanit - sic e cilësoi rrjeti televiziv amerikan CNN - ishte nën shoqërinë e një drejtuesi të lartë të policisë.
Edi Rama që po pushon disa kilometra më tej duhet tju shpjegojë shqiptarëve: Cfarë po bënte,  Zëvendësdrejtori i Përgjithshëm i Policisë së Shtetit, Rebani Jaupaj në resortin turistik ku po pushonte i këkuari ndërkombëtar për trafik droge, Eskobari i Ballkanit, Klement Balilaj?
Opinionit publik, nuk i nevojitej edhe një fakt më shumë për të kuptuar shpartallimin që Edi Rama i ka bërë rendit, sigurisë dhe Policisë së Shtetit, nëpërkëmbjen e burrave e grave në uniformë, me drejtues që ruajnë parcelat me drogë, që vjelin 30 përqindëshin, e që bëjnë pushime me trafikantët.
Por cdo ditë që kalon thellohet edhe më shumë gjirizi i krimit dhe drogës ku është futur kryeministri në detyrë, gati të sfidojë edhe DEA-n amerikane, duke mbrojtur një të kërkuar prej saj si Klement Balili.
Shqiptarët nuk mund të pranojnë kurrë të sundohen nga baronët e drogës".​

Redaksia Online
l.q/Shqiptarja.com