PD: Inspektori i korruptuar në 
IKMT mik i Tahirit dhe i Veliajt

Partia Demokratike ka reaguar pas video skandalit në të cilin u përfshinë dy punonjës të Inspektoriatit të Kontrollit e Menaxhimit të Territorit, ngjarje pas të cilës ata u shkakruan nga drejtoresha e përgjithshme, Dallëndyshe Bici.

Partia Demokratike, përmes Leonard Ollit ka thënë se një nga të përfshirët në këtë skandal është mik i ministrit të brendshëm, Sajmir Tahiri dhe kryebashkiakut të Tiranës, Erion Veliaj.

Sipas Ollit, ky nuk është një rast i izoluar, ku funksionarë të Shtetit kërkojnë para në këmbim të favoreve që iu bëjnë qytetarët, që në fakt ata thjeshtë iu ofrojnë shërbime që me ligj iu takon.

Ai ka shtuar se ky rast është shëmbëlltyra e vërtetë e qeverisë.

Ja deklarata e plotë e Leonard Ollit
Skandali i zbuluar nga emisioni investigativ Stop, nuk është një rast i izoluar i një inspektori të ndërtimit që kërkon para në këmbim të favorit.
Ky rast korruptiv, është e vërteta e rilindjes, është shëmbëlltyra e saj.
E para tregon mënyrën se si është bërë inspektor personi në fjalë. Një militant që vjen e ushtron me arrogancë e me dhunë, pushtetin, përmes njohjeve që ka me Saimir Tahirin e Erion Veliajn.
Përmes lidhjeve nepotike po ashtu, duke qënë vëllai i këshilltarit të majtë në Bashkinë e Tiranës, Florian Pullazi.
E dyta, ky rast tregon se Pullazi dhe shefat e tij, rrjeti i tij, e gjithë ngrehina të cilës ai i përket, ka ardhur në pushtet për të bërë para.
Me babëzi, duke shkelur ligjin, duke dhunuar qytetarët e pamundur, e duke i rrjepur ata, kështu funksionin banda e INUK dhe bandat e tjera të Edi Ramës që i janë vërsulur popullit që ditën e parë që erdhën në pushtet.
Koha e këtij shteti të korruptuar e kriminal;
Koha e këtyre maskarenjeve ka mbaruar.
Populli është në këmbë dhe shumë shpejt ka tu treguar vendin.

Redaksia Online
(F.T/shqiptarja.com)