TIRANE - Partia Demokratike ka kërkuar heqjen e mandatit të deputetit të mazhorancës Koço Kokëdhima, me pretendimin se ky i fundit ka përfituar nga fondet publike. Në një dalje për mediat, deputetja e PD Jorida Tabaku ka akuzuar deputetin e mazhorancës se ka përfituar të paktën 150 fonde publike nga pasuria e qytetarëve të vendit.

Tabaku theksoi se kjo është një shkelje e rëndë e Kushtetutës dhe që sjell automatikisht përfundimin e mandatit të Kokëdhimës, ndërsa shtoi se kjo kërkesë i është paraqitur edhe Kryesisë së Kuvendit.

Më poshtë fjala e plotë e Jorida Tabakut:
Jam këtu për tu informuar se Grupi Parlamentar i Partisë Demokratike sapo ka dorëzuar kërkesën për mbarimin e mandatit të deputetit të Partisë Socialiste, Koco Kokëdhima, bazuar në Kushtetutën e vendit. Ne kemi arritur në konkluzionin, bazuar mbi fakte e argumenta e pas një pune disa mujore hulumtimi e hetimi, të bërë nga departamenti anti-korrupsion në Partinë Demokratike, se deputeti Koco Kokëdhima ka përfituar fonde publike nga pasuria e qytetarëve të vendit. Kjo është rreptësisht e ndaluar nga Kushtetuta dhe sjell automatikisht përfundimin e mandatit të tij. Eshtë provuar nga ne, se deputeti përfiton fonde publike prej shtatorit të vitit 2013. Ka qënë media e para qe ka zbuluar disa detaje të këtyre kontratave dhe me pas ekspertët e departamentit te antikorupsionit kanë bërë hetime të hollësishme në thesarin e shtetit nga ku ka rezultuar se ‎janë të pakten 150 raste të kalimit të parave në llogaritë e deputetit Kokëdhima. Vijmë këtu, bazuar në nenin 69, 70 dhe 71 të Kushtetutes ku parashikohet qartë se mandati i deputetit përfundon në rast se ai ka përfituar fonde publike. Provat janë të qarta, janë të depozituara në Kuvend dhe ne i kërkojme Kryetarit të vërë në lëvizje një orë e më parë kerkesen tonë dhe të zhvilloje procedurat e parashikuara nga ligji, rregullorja, kushtetuta dhe Vendimi i Gjykates Kushtetuese, si në rastin e deputetit Ilir Beqja. Kërkesën e plotë, me rastet e detajuara të marrjes së fondeve, prat ë shkeljes së Kushtetutës, do ta keni të gjithë ju përfaqësuesit e medias, pasi menjëherë do ta shpërndajë zyra e shtypit e Partisë Demokratike.

Redaksia Online
(e.c/shqiptarja.com)