PD, Koduzi: "Fshesa Beqaj" po
largon bluzat e bardha nga puna

TIRANE - Partia Demokratike akuzoi këtë të shtunë ministrin e Shëndetësisë Ilir Beqja se po bën shkurtime masive në radhët e bluzave të bardha në të gjithë vendin, pa asnjë analizë. Në një deklaratë për mediat nga selia blu, nëndrejtori i Departamentit të Shëndetësisë Gazment Koduzi akuzoi se "fshesa Beqaj" siç ai e quajti, bëhet për të çuar fitime në xhepin e tij e të miqve të kryeministrit Rama që kanë marrë koncesione në sektorin e shëndetësisë. 

Koduzi tha se ky personal shëndetësor i shkarkuar do të rikthehet në punë nëse demokratët do të marrin pushtetin në zgjedhjet e parakohshme që ata synojnë të mbahen.

Deklaratë e nëndrejtorit të Departamentit të Shëndetësisë, Gazment Koduzi
Kampioni i korrupsionit, Ilir Beqa, po vazhdon fushatën e tij të spastrimit të infermierëve e personelit shëndetësor në rrethe, duke larguar nga puna dhjetra profesionistë që kanë një jetë në shërbim, thjesht e vetëm për të nxjerrë paratë që i duhet të ndajë për koncesionet qindra milionë euroshe të miqve të tij dhe të Edi Ramës.

Nuk ka asnjë studim për shkurtimin e personelit mjekësor dhe jo-mjekësor, asnjë referencë apo analizë, asnjë konsultim. Këto shkurtime bëhen pa transparencë, në mënyrë tinzare.

Dhjetra infermierë e personel të hedhur në rrugë, nga veriu në jug.

30 janë larguar në Mirditë, 90 në Shkodër, 60 në Tepelenë, 49 në Pukë, 36 në Lushnje, 30 në Dibër, dhe priten këto ditë qindra largime të tjera në spialet e vendit.

Fshesa Beqaj, që ka vetëm një interes, sigurimin e parave për biznesin e tij dhe të Ramës në shëndetësi, jo vetëm po shkakton dramë sociale tek profesionistët që flaken në rrugë e tek familjet e tyre, por po degradon më tej gjendjen e spitaleve, duke e bërë të pamundur ofrimin e shërbimeve të specializuara.

Partia Demokratike i dënon me forcë këto masa skandaloze e korruptive.

Ne mbështesim protestën e infermierëve dhe personelit mjekësor dhe i bëjmë thirrje të ngrihen në rezistencë e të mos tërhiqen para kësaj padrejtësie e arrogance të dyshes Rama-Beqa.

Partia Demokratike i siguron këta profesionistë, infermierë, sanitarë e personel shërbimi mjekësor, se do të kthehen në detyrë, e do të rifitojnë dinjitetin e tyre, sapo qytetarët të na japin përgjegjësinë e drejtimit të vendit.

Redaksia Online
(Gre.M/Shqiptarja.com)