Komisioni i Vlerësimit të Kandidaturave përjashton disa ish-deputetë të PD-së nga gara. Mes tyre janë ish deputeti Ervin Salianji si dhe Endri Hasa.

Burmie për Report Tv bëjnë të ditur se ka mbi 10 ish-deputetë të dalë nga zgjedhjet e 2017 të cilët janë skualifikuar nga komisioni i ngritur pranë PD-së ku ndër të tjerë janë Nada Meçorapja, Lindita Metaliaj, Romeo Gurakuqi, Xhemal Gjunkshi, Fatbardha Kadiu.

Këtë të enjte (22 tetor) Komisioni i Vlerësimit në PD përfundoi procesin e vlerësimit të emrave që u votuan nga anëtarësia. 326 emra, në të cilën mungon Salianji, do të shqyrtohen nga Kryesia e PD-së, për të përcaktuar listën finale të kandidatëve.  

Ish-deputeti Ervin Salianji është dënuar me 1 vit burg nga gjykata për akuzën e 'kallëzimit të rremë' lidhur me inskenimin e audio-përgjimit me qëllim përfshirjen e vëllait të ish-ministrit të Brendshëm Fatmir Xhafaj në trafikun e drogës.

Në total, Komisioni i Vlerësimit në PD ka skualifikuar rreth 150 emra. Ndërkohë në fazën e dytë të përzgjedhjes së kandidatëve për deputetë përmes votave nga anëtarësia u skualifikua dhe ish-deputeti Klevis Balliu në degën e Pogradecit, qarku Korçë.

Ai ka qenë një nga udhëheqësit e protestave të banorëve në zonën e Astrit në Unazën e Re në Tiranë si dhe një nga zërat më të fortë të selisë blu kundër qeverisë, por duket se demokratët nuk janë të kënaqur nga puna dhe kontributi i tij.