PD: Hasi tërësisht i bllokuar, pa
rrugë, pa drita e pa ujë të pijshëm

Partia Demokratike ka akuzuar edhe këtë të premte qeverinë shqiptare, pasi sipas tyre nuk po i ndihmon banorët e Hasit në këto ditë të vështira për shkak të reshjeve të dendura të dëborës.

Në një deklaratë për mediat, Grida Duma është shprehur se nga dhënat e saj, i gjithë rrethi i Hasit është i izoluar ku të gjitha rrugët janë bllokuar dhe se mundon uji i pijshëm dhe energjia elektrike.

Duma i ka bërë thirrje qeverisë të ndërhyjë në mënyrë të menjëhershme në këto zona dhe t'ju vijë në ndihmë banorëve të Hasit.

Deklarata e plotë e Grida Dumës:

Partia Demokratike shpreh shqetësimin për gjendjen e rëndë ku ndodhet i gjithë rrethi i Hasit.

Të dhënat tona tregojnë se prej dje, i gjithë rrethi është izoluar, të gjitha rrugët janë të bllokuara, dhe nga dje nuk ka drita, as ujë të pishëm.

Raportohet se mungojnë absolutisht ndërhyrjet qeveritare dhe banorët e kanë të pamundur të komunikojnë apo të marrin ndihma.

Ndërkohë, kësaj gjendje i shtohet edhe epidemia e gripit, dhe banorët e rrethit të  Hasit e kanë të pamundur të marrin ndihmë shëndetësore.

Trashësia e dëborës shkon nga 50 centimetra, deri në 1 metër e gjysëm në shumë zona.

Partia Demokratike i bën thirrje qeverisë të ndërhyjë menjëherë dhe tu vijë në ndihmë banorëve të rrehit të Hasit.

Ne do të raportojmë sot në mënyrë periodike për situatën në zonat më të goditura nga moti i keq, me besimin se do tu vijmë në ndihmë banorëve.​

Redaksia Online
XH.K/Shqiptarja.com