PD:Negociatat ilegale për Skavicën
Rama nuk i mbulon me gënjeshtra

Partia Demokratike ka vijuar për të tretën ditë me radhë akuzat e saj ndaj qeverisë, për çështjen e konçensionit ndaj hidrocentralit të Skavicës.

Grida Duma, sekretarja për marrëdhënje me publikun, ka dalë sot sërish në foltoren e Partisë Demokratike, ku ka thënë se qeveria është e zhytur në këtë projekt korruptiv, ndaj dhe ajo luan rolin e të heshturit gjë që fakton se fituesi i këtij projekti është i paracaktuar.

Duma ka shtuar se, koha e propagandës dhe gënjeshtrave ka përfunduar, duke e akuzuar kryeministrin si më të korruptuarin në Ballkan.

Ja deklarata e Grida Dumës në Partinë Demokratike.
 
Edi Rama po konfirmon çdo ditë se është i zhytur në një nga aferat më të mëdha me pasurinë kombëtare, siç është rasti i Skavicës.
Refuzimi i transparencës prej tij, vërteton se Rama e ka paracaktuar fituesin, pas bisedimeve sekrete dhe ta paligjshme që ka mbajtur në Turqi.
Edi Rama nuk përgjigjet, nëse kompania që ai ka vendosur ti japë Skavicën, me pazare të fshehta, pa garë e transparencë, është apo jo në listën e zezë, për shkak të veprimtarisë së saj të mëparshme, e shpallur si e tillë nga autoritetet turke e ndërkombëtare?
Edi Rama nuk përgjigjet, se përse kompania që ai ka takuar fshehtas e shpall vendimin që e ka fituar koncesionin, përpara se ta shpallë qeveria.
Edi Rama nuk përgjigjet, pse e mbajti të fshehtë vendimin dhe u detyrua ta publikojë atë dy javë më pas, prej denoncimeve të opozitës.
Edi Rama nuk përgjigjet, sa herë ka udhëtuar në Turqi ministri i tij Ahmetaj, dhe a ka bërë negociata sekrete e të paligjshme me kompaninë.
Edi Rama nuk përgjigjet; a ka pasur kompani të tjera të interesuara për projektin Skavica dhe pse i dha bonusin maksimal kompanisë me të cilën bëri negociata sekrete.
Koha e gënjeshtrave dhe propagandës ka mbaruar.
Edi Rama, kryeministri më i korruptuar në Ballkan, që ka nxjerrë në pazar pasuritë publike e shpërndan koncesionet sipas interesave të tij, do të japë përgjigje e do të mbajë përgjegjësi për të gjitha zullumet e tij.


Redaksia Online
(F.T/shqiptarja.com)