PD nis hetimin e Spahiut
Alibeaj: Opozita të marrë pjesë

TIRANE-  Nis punën Komisioni hetimor për shkarkimin e Kreshnik Spahiut nga posti i nënkryetarit të KLD-së. Komisioni ka për objekt dhe detyrë të verifikojë të dhënat, faktet dhe rrethanat për aktet dhe sjelljet që diskreditojnë rëndë pozitën dhe figurën e postit të lartë kushtetues të Zëvendëskryetarit të KLD-së dhe që përbëjnë shkak ligjor për shkarkimin e tij nga detyra.

Komisioni drejtohet nga deputeti i PD-së Enkelejd Alibeaj, ish ministër i Drejtësisë, dhe duhet të përbëhej nga 9 anëtarë, 5 të propozuar nga PD dhe 4 nga PS.
Nga PD, anëtarë të komisionit janë dhe Ramiz Çoba, Paulina Hoti e Gerti Bogdani, Ledina Aliolli, ndërsa të majtët sikundër kanë paralajmëruar nuk kanë paraqitur asnjë emër për anëtarët e komisionit më të ri hetimor në Kuvendin e Shqipërisë, pasi e quan një çështje vetëm të maxhorancës.

Kryetari i komisionit Enkelejd Alibeaj tha se komisioni do të zgjasë 3 javë dhe ka për objekt verifikimin, e fakteve dhe pretendimet e 33 deputëve të Partisë Demokratike, se Spahiu ka shkelur Kushtetutën dhe ka diskretituar Këshillin e Lartë të Drejtësisë. Aliebaj nënvizoi se komisioni do të ndjekë një proces të rregullt ligjor se asnjë anëtar nuk ka konflikt interesi, ndaj “opozita duhet të marrë pjesë në komision”- tha Alibeaj.

Komisioni hetimor i dërgoi sot një shkresë Spahiut ku i kërkonte që  brenda 3 javëve të caktojë një datë për tu paraqitur në komision. 


MIRATIMI I KOMISIONIT
Kuvendi miratoi, më 26 janar, me 73 vota të maxhorancës, vendimin për të nisur hetimin ndaj zëvendëskryetarit të KLD. Në seancën plenare relatori i çështjes, Viktor Gumi deklaroi se 33 deputetë demokratë kanë fimrosur kërkesën, sipas së cilës Spahiu duhet të shkarkohet pasi ka shkelur Kushtetutën dhe ka diskretituar Këshillin e Lartë të Drejtësisë.
Para se të kalonte në votim ngritja e këtij komisioni, Kreshnik Spahiu iu drejtua Kuvendit më një letër ku kërkonte të thoshte fjalën e tij në seancë, për në përgjigjen e Kuvendit shkruhej se nuk e lejonte rregullorja parlamentare.
(sg/shqiptarja.com)