PD thyen bojkotin, Strazimiri merr
pjesë në komisionin e ligjeve

Partia Demokratike ka thyer sot bojkotin dhe po merr pjesë në Komsiionin e ligjeve. Në seancë është i pranishëm edhe deputeti Gent Strazimiri shumë i përfolur ditët e fundit për shkak të pranisë së tij me armë në protestën tek liqeni.

Nuk dihet nëse mazhoranca do të lëshojë sinjale bashkëpunimi në pritje të uljes në tryezë dialogu mes Ramës dhe Bashës për reformën në drejtësi, por ndryshimi i ligjit për dekriminalizimin dhe komisionet hetimore do t’i nënshtrohen debateve në një seancë ku do të marrë pjesë dhe opozita. Ndonëse u bë efektiv vetëm muajin e kaluar me miratimin e akteve nënligjore, ligji dekriminalizimit mund të ndryshohet sërish me kërkesë të PD-së.

Kjo forcë kërkon të krijojë një precedent ligjor me rastin “Prenga” duke shtuar në ligj pezullimin nga detyra në rast se deputeti ose zyrtari arrestohet në flagrancë, pa pritur vendimin e gjykatës. “Nëse një funksionar publik arrestohet në flagrancë për kryerjen me dashje të një vepre penale kundër jetës ose shëndetit të shtetasve, atëherë krijohet dyshimi i bazuar për pamundësinë ligjore që ai njëkohësisht të ushtrojë funksionet publike në shërbim të qytetarëve. Për këtë qëllim, në nenin 2 është shtuar një formulim ndalues, i cili nuk passjell shkarkimin e tij nga detyra, për arsye të respektimit të parimit të prezumimit të pafajësisë, por pezullimin nga detyra deri në përfundimin e çështjes me vendim gjyqësor të formës së prerë. Nëse funksionari publik deklarohet i pafajshëm me vendim gjyqësor të formës së prerë, atëherë pezullimi konsiderohet i pushuar,”-thuhet në relacionin që shoqëron ligjin.

Por një precedent i tillë është i ngjashëm me atë të Strazimirit, i cili nëse do të ishte arrestuar nga policia gjatë protestës tek liqeni teksa mbante një armë pa leje, do të bënte vetë propozuesin viktimë. Vetë deputeti Gent Strazimiri është anëtar i Komisionit të Ligjeve, ndaj mbledhja e së hënës ngelet interesante në këtë drejtim. Përsa i përket ligjit të dekriminalizimit që është miratuar, zyrtarët duhet të dorëzojnë formularët e vetëdeklarimit të së shkuarës deri në 4 maj.

Kushti i dytë i opozitës që do të kalojë në votën e deputetëve të Komisionit të Ligjeve është ai për ndryshimin e komisioneve hetimore, duke i hequr mazhorancës mundësinë e bllokimit të punës së këtyre strukturave. Burime për Shqiptarja.com nga PD konfirmojnë se do të jetë një seancë plot debat mbledhja e këtij komisioni nesër, kjo për faktin se nismat janë futur sipas tyre në procedurë parlamentare në limitet kohore. Po sipas të njëjtave burime, të 3 kushtet e dakordësuara në dhjetor 2014 nën praninë e ndërkombëtareve, për të rikthyer opozitën në parlament janë në krizë. Kushti i tretë është zbatimi i vendimeve të Gjykatës Kushtetuese.
 
Kushtet
Ndryshimet që propozon opozita për ligjin e funksionimit të komisioneve hetimore, si dhe amendimet e PD për ligjin e sapo miratuar të dekriminalizimit do të shqyrtohen sot në Komisionin e Ligjeve.
 
Bojkoti
Partia Demokratike do të thyejë bojkotin sot, për të marrë pjesë  në komisionet parlamentare, ky do të shqyrtohen dy nga kushtet që ajo i ka vendosur mazhorancës. Kushti tjetër i saj është zbatimi i vendimeve të Gjykatës Kushtetuese.


Redaksia Online
(A.N/Shqiptarja.com)