PDIU i “lëshohet” Rrugës
së Arbrit, replikë me LSI

Teksa partitë politike kanë ndezur të gjitha motorët e riorganizimit në prag të kësaj fushate elektorale, PDIU ka nisur fuqishëm fushatën në qarkun e Dibrës. Duket se kjo do të jetë zona elektorale që do t’i besohet deputetes më të re, po edhe më të promovuar brenda kësaj partie, Mesila Doda. Kjo konfirmohet nga disa lëvizje politike të Shpëtim Idrizit, i cili ka fuqizuar Dodën në krye të grupit parlamentar, e po ashtu i ka besuar sipërmarrje të fuqishme politike, duke e bërë zërin më përfaqësues edhe në debatin publik sa i takon kësaj partie.

Pas një takimi elektoral në Dibër, ku Doda ka edhe origjinën e hershme, ajo ishte protagoniste. Nga ajo ditë, bërja e Rrugës së Arbrit, u kthye thuajse në motiv të kësaj partie, duke bërë shkrime në disa media për këtë çështje, e disa herë duke replikuar përmes medias, me deputetin e Dibrës nga krahu i LSI-së, Përparim Spahiu. Ky i fundit, po ashtu, kohë përpara takimit të PDIU-së në Dibër, i kishte kërkuar qeverisë në disa raste mbajtjen e premtimit për këtë rrugë. Por ditën e djeshme, në Kuvend është depozituar një interpelancë, me kërkesë të Shpëtim Idrizit, i cili i kërkon Metës një përballje për këtë rrugë mes Edmond Haxhinastos, dhe Mesila Dodës. Ky faktorizim pritet të rritë kredibilitetin e kësaj deputeteje në këtë zonë. “Në mbështetje  të nenit 96 të Rregullores së Kuvendit të Shqipërisë, paraqesim kërkesën tonë për interpelancë me Ministrin e Infrastrukturës, Edmond Haxhinasto, në lidhje me ecurinë e punës në Rrugën e Arbrit.

Duke e konsideruar me rëndësi të jashtëzakonshme që ka ky projekt për Dibrën dhe gjithë zhvillimin e zonës verilindore, për fuqizimin ekonomik dhe rritjen e shkëmbimeve tregtare e njerëzore me të gjithë trevat e tjera të Shqipërisë; duke nënvizuar rolin tejet të rëndësishëm që ka ky projekt për përafrimin e shqiptarëve me banim në Maqedoni me shtetin amë dhe detyrimin kushtetues që ka shtetit shqiptar për përkujdesin ndaj tyre, kërkojmë të merren masa për zhvillimin e një interpelance sa më shpejt të jetë e mundur”-thuhet në kërkesën e Idrizit. Po ashtu, kërkohet që interpelanca të përqendrohet në dhënien e informacionit për disa pyetje rreth këtij investimi. “A do ta ndërtoni Rrugën e Arbrit? A do ta ndërtoni brenda këtij mandati Rrugën e Arbrit?

Sa fonde janë dhënë deri më tani për këtë rrugë dhe si është zgjidhur çështja e financimit të saj? Ku ka ngecur realizimi i këtij procesi dhe si është menduar të zgjidhet? Sa është dëmi që pësojnë banorët e zonës për mos përfundimin e infrastrukturës? Sa do e shkurtonte distancën e sotme ndërtimi i Rrugës së Arbrit? Edhe sa kohë do të duhet për të përfunduar Rruga c Arbrit? Ku jeni me premtimet e fushatës elektoralë dhe programin e qeverisë lidhur me këtë çështje? Interpelanca do të zhvillohet nga deputetja, Mesila Doda”-përfundon letra e Idrizit. 



Redaksia Online
A.N shqiptarja.com