PEQIN - Partia Drejtësi, Integrim dhe Unitet këtë herë ka zbritur në qytetin e Peqinit, ku ka prezantuar kandidatin për deputet të kësaj force politike për qarkun e Elbasanit, Aqif Rakipin. Gjatë fjalës së tij, kryetari i PDIU-së, Shpëtim Idrizi ka falenderuar të gjithë të pranishmit dhe është shprehur i bindur në fitoren e PDIU-së në zgjedhet e 23 qershorit. Ai ka analizuar edhe gjendjen e ish-të përndjekurve në Shqipëri, duke pasqyruar programin e PDIU-së për këtë pjesë të shoqërisë. “Tallja 23-vjeçare me ish-të përndjekurit është turp mbarëkombëtar", ka thënë Idrizi.

TALLJE 23-VJEÇARE ME TË PËRNDJEKURIT

Idrizi, teksa ka prezantuar programin e Partisë Drejtësi, Integrim dhe Unitet është ndalur tek zgjidhja e problemit të ish-të përndjekurve, duke pasqyruar programin e PDIU-së për këtë pjesë të shoqërisë. “Tallja 23-vjeçare me ish-të përndjekurit është turp mbarëkombëtar. Shoqëria shqiptare i ka një borxh të madh atyre, që u dënuan padrejtësisht, sepse mbrojtën ato të cilat sot i kemi të shenjta: lirinë. Dëmshpërblimi ndaj tyre duhet të ishte mbyllur. Ne kemi plan konkret dhe të qartë: 20% e çdo privatizimi të kaloj në fondin e kompensimit te ish-të përndjekurve. Brenda dy viteve merr fund saga e tyre.” – u shpreh Idrizi.

PDIU, ZËRI PATRIOT

Më tej ai theksoi se zoti Aqif Rakipi do të jetë zëri i Elbasanit në Parlamentin e Shqipërisë, si një zë patrioti që do të punoj vetëm për të mirën e shqiptarëve, aty ku Zoti i ka vënë. “Miq, unë jam sot këtu përpara kush për të prezantuar shokun, mikun, zërin tuaj në Parlamentin e ardhëshëm, Aqif Rakipin. Ai së bashku me deputetët e tjerë të PDIU-së do të jenë zëri patriot në Parlament dhe nuk do të lejojnë cenimin e shqiptarëve, kudo që janë. Unë ju ftoj që më datë 23 qershor, të gjithë t’i drejtoheni kutive të votimit të dhe të votoni numrin 50, Partinë Drejtësi, Integrim dhe Unitet në mënyrë që e ardhmja juaj, e fëmijëve tuaj dhe e kombit shqiptar të jetë e begatë.” – mbylli fjalën e tij zoti Idrizi.

Ndërkaq nga ana e tij Aqif Rakipi vuri theksin tek puna e kryer deri më tani nga dy deputetët e PDIU-së në Parlament, por kërkoi nga të gjithë shqiptarët, që në 4 vitet e ardhshme Parlamenti i Shqipërisë të ketë 7 zëra patriotësh, të cilët të luftojnë për të drejtat e kombit shqiptar. “Në katër vjet, edhe pse me vetëm dy deputet PDIU bëri shumë gjëra, duke nxjerrë çështjen çame nga harresa, por që kjo rrugë të vazhdojë akoma edhe më tej, me më shumë forcë duhet që të gjithë shqiptarët të votojnë numrin 50, Partinë Drejtësi, Integrim dhe Unitet për t’i dhënë dinjitet vetes dhe kombit shqiptar." - mbylli fjalën e tij zoti Rakipi.

Redaksia Online
(mag/shqiptarja.com)