PDIU: Koha e bashkimit
diplomatik Kosovë- Shqipëri

TIRANE-  Partia për Drejtësi, Integrim dhe Unitet përshëndet marrëveshjen e arritur mes Shqipërisë dhe Republikës së Kosovë për përfaqësi të përbashkët konsullore në ato vende ku Kosova nuk ka përfaqësi të sajën dhe bën thirrje për bashkim diplomatik

Nëpërmjet një njoftimi për shtyp PDI vlerëson se përfaqësimi i përbashkët konsullor është në drejtimin e duhur, edhe për faktin se diaspora shqiptare nuk mund të konceptohet si e ndarë për shkak të demarkacioneve shtetërore, por duhet të shihet si një tërësi.

“Tashmë shqiptarët, qofshin të Shqipërisë, qofshin të Kosovës, do të kenë një adresë për t’u mbështetur në vendet ku jetojnë dhe punojnë”, deklaroi Sekretari për Marrëdhëniet me Publikun, i PDIU-së, Ardit Bido.

PDIU pas këtij bashkimi konsullor thotë se ka ardhur koha edhe për bashkimin diplomatik.

"Bashkimi diplomatik ndërmjet Shqipërisë dhe Kosovës nuk pengohet nga askush. Ajo është në përputhje me Konventën e Vjenës për Misionet Diplomatike të vitit 1961. Në nenin 6 të kësaj marrëveshjeje përcaktohet se “dy ose më shumë shtete mund të akreditojnë të njëjtin person si drejtues të misionit në një shtet tjetër, nëse shteti pranues nuk shpreh kundërshtime”, tha Bido.

Për këtë arsye, PDIU vijon të kërkojë nga qeveria e Republikës së Shqipërisë dhe qeveria e Republikës së Kosovës, që në ato vende që e kanë njohur pavarësinë e Kosovës dhe ku Kosova nuk ka mundësitë apo kapacitetet që të ketë një mision të vetin diplomatik, ambasadat e Republikës së Shqipërisë të funksionojnë në përputhje me nenin 6 të Konventës së Vjenës, duke përfaqësuar diplomatikisht edhe Kosovës
(sg/shqiptarja.com)