Raportuesi për Shqipërinë në PE, Knut Fleckenstein, u shpreh se Shqipëria kë shënuar rezultate pozitive në përmbushjen e kushteve, ndërsa rekomandoi çeljen e negociatave të anëtarësimit pa humbur kohë. "Kemi thënë se kur bëhet fjalë për reformën në drejtësi, Komisionit i kërkohet të bëjë një proces të kujdesshëm monitorimi. Mendoj se duhet të nisim negociatat me Shqipërinë. Dhe vendimi duhet të merret në Parlament me një shumicë të madhe", u shpreh Fleckenstein.
Qëndrimeve të disa eurodeputetëve se Shqipëria ka ende punë për të bërë, me qëllim përafrimin e standardeve me ato të BE, raporteri për Shqipërinë, Knut Fleckenstein u përgjigj se reformat janë në rrugën e duhur dhe se s'mund të pritet arritja e perfeksionit pastaj të çelen negociatat. Kjo sipas tij do të ishte humbje kohe.
"Të presim për të futur në rrugën e duhur gjithçka dhe të presim të bëhet gjithçka, mendoj se është të humbasësh kohën. Është e drejtë që të njihet ajo që është bërë deri tani. Ju thatë për ligjin e Mediave dhe atje ka qenë një fraksion politik në Shqipëri i cili ka qenë qartësisht pengues", u shpreh Fleckenstein.
Redaksia Online
(L.Q/Shqiptarja.com)