Përgjimet, Visho Ajazi sot në
mbledhjen e Komisionit të Sigurisë

TIRANE - Komisioni i Sigurisë pritet që të përfshihet nga një debat ndërmjet Kryetarit të Shërbimit Informativ Shtetëror, Visho Ajazi Lika dhe deputetëve të komision. Duke qenë se në axhendën e punimeve është parashikuar që të miratohet buxheti vjetor për SHISH-in, pritet që kryetari i këtij institucioni të shkojë për të diskutuar në Komision lidhur me kërkesat që ai mund të ketë për financat në vitin 2015.

Të paktën kjo ka qenë praktika e tij deri më sot ku gjithmonë ka vajtur vetë për të diskutuar me deputetët e komisionit. Por prezenca e tij në komision vjen në një kohë kur ka plasur skandali i përgjimeve.

​Brenda Komisionit të Sigurisë është ngritur edhe grupi i kontrollit të Shërbimit Informativ Shtetëror përsa i përket përgjimeve të paligjshme nga ky institucion. 

Vetëm pak javë më parë, ky grup kontrolli i cili përbëhet nga deputetët Xhemal Qefalija, Pirro Lutaj dhe Pjerin Ndreu, kanë prezantuar në Komisionin e Sigurisë një raport paraprak për kontrollin e bërë ndaj SHISH ku rezultonte se në listën e përgjimeve ishin futur edhe një pjesë e politikanëve të lart, mes tyre edhe vetë tri deputetët e grupit të kontrollit. 

Kjo gjë pritet që të ndez debatin brenda Komisionit të Sigurisë ku deputetët e mazhorancës do të kërkojnë sqarime ndaj kreut të Shërbimit Informativ Shtetëror mbi skandalin e përgjimeve. Kjo gjë lidhet edhe me faktin se në listën e të përgjuarve ishin edhe ministra edhe Kryetari i Kuvendit Ilir Meta, gjë e cila ia rëndon edhe më shumë pozitat kreu të Shërbimit Informativ Shtetëror. 

Ajo që mbetet ende enigmatike është fakti nëse Visho Ajazi Lika do të vijojë traditën e tij duke vajtur personalisht në mbledhjen e Komisionit të Sigurisë apo do të dërgoi përfaqësuesit e tij në mënyrë që të shmang edhe debatet me deputetët e mazhorancës për përgjimet.

Redaksia Online
(e.c/shqiptarja.com)

/Shqiptarja.com

TAG:
• visho ajazi lika