Perime në ballkon? Ja kopshti i Rezarta Delisulës në katin e pestë të pallatit

Perime në ballkon? Po mund të mbillen dhe këtë na e vërteton më së miri shembulli që ju sjellim. “Rreze Dielli” ka shkuar në shtëpinë e gazetares Rezarta Delisula e cila prej vitesh tashmë kultivon bimë të ndryshme në balkonin e saj. Gazetarja e njohur për penën e saj prej 23 vitesh tashmë, ka si pasion kultivimin e frutave, perimeve dhe erëzave. Ballkonin e saj modest prej 4 metrash linearë, dhe tarracën e shtëpisë së saj, Rezarta i ka shfrytëzuar për t’i shndërruar në oaze të gjelbër me fruta dhe perime të freskëta sipas stinëve përkatëse. Në stinën e dimrit, ajo kutivon qepë të njoma, sallatë dhe brokoli, ndërsa tani në pranverë mbjell speca, domate, patëllxhanë, luleshtrydhe dhe lloje të ndryshme erëzash, si spec djegëz, koper, majdanoz, nenenxhik, aloe vera, etj. Por në tarracën e saj ku hapësira lejon edhe më shumë mundësi, Rezarta Delisula kultivon dhe agrume, si limonat, ullinjtë madje dhe frutin e kivit, të cilat ajo ka dëshirën t’i shndërrojë në pjergulla që do të zbukurojnë këndin  e tarracës së saj.

Prej tetë vitesh tashmë, qëkur djali i saj, Moreli ishte i vogël, Rezarta vendosi të kultivojë perime në ballkonin e saj, në mënyrë që djali i saj të ushqehej shëndetshëm. Një kujdes të cilin e vazhdon ende sot, me po të njëjtin pasion, duke u munduar që këtë edukatë t’ia përcjellë dhe djalit të saj, i cili dhe lojërat e tij shpesh i ble në formën e një ferme ku meson të mbjellë fara të ndryshme.

Perimet në ballkonin e gazetares Rezarta Delisula

/b.ha./Shqiptarja.com

TAG:
• rreze dielli
• rezarta delisula
• perime ne ballkon