TEKSAS- 21 persona kanë mbetur të vdekur nga një sulm me armë zjarri të ndodhur këtë të shtunë në qytetin e El Pasos në Teksas.  CNN raporton se nga sulmi kanë mbetur të plagosur të paktën 26 persona, mes tyre edhe një fëmijë.

Mediat ndërkombëtare raportojnë se autor i këtij sulmi ka qenë Patrick Crusius, një 21-vjeçar i cili ka qëlluar me kallashnikov në drejtim të turmës. Ai ka nisur të qëllojë që nga parkingu i qendrës tregtare dhe më pas është afruar pranë turmës duke qëlluar në drejtim të njerëzve të cilët ndodheshin në ambientet e brendshme të saj.

Autori është vënë në prangat e policisë ndërkohë që autoritete po punojnë për zbardhjen e plotë të dinamikës së kësaj ngjarjeje. Personat të cilët janë gjendur në qendrën tregtare në momentin e sulmit janë larguar të tmerruar, ndërkohë që tre restorante në zonë kanë mbyllur dyert duke reaguar ndaj situatës emergjente.