Gaza/ Izraeli: Kryqi i Kuq i ka dorëzuar ushtrisë arkivolet e 2 pengjeve! Këshilltari për sigurinë, i shkarkuar nga Netanyahu: Të hetohet dështimi i 7 tetorit, kam qenë bashkëpërgjegjës

Uria nuk mund të përdoret si armë lufte në Gaza. Ky është paralajmërimi i dhënë sot nga Gjykata Ndërkombëtare e Drejtësisë, gjykata më e lartë e Kombeve të Bashkuara me seli në Hagë."Gjykata rithekson detyrimin e Izraelit për të mos përdorur urinë e popullsisë civile si një metodë lufte," deklaroi presidenti i Gjykatës, Yuji Iwasawa. Sipas Gjykatës Ndërkombëtare të Drejtësisë, Izraeli ka detyrimin të lehtësojë dërgimin e ndihmave në Gaza, përfshirë ato të siguruara nga Agjencia e Kombeve të Bashkuara për Refugjatët Palestinezë (UNRWA). "Gjykata konsideron se Izraeli ka për detyrë të pranojë dhe lehtësojë programet e ndihmës së ofruara nga Kombet e Bashkuara dhe agjencitë e tyre, përfshirë UNRWA-në," sqaroi presidenti Iwasawa në opinionin këshillimor të gjykatës lidhur me detyrimet e Izraelit ndaj pranisë së OKB-së në territoret palestineze të pushtuara.

Tzachi Hanegbi

Kryeministri izraelit, Benjamin Netanyahu, ka shkarkuar nga detyra këshilltarin për Sigurinë Kombëtare, Tzachi Hanegbi. Lajmin e kanë raportuar mediat lokale, duke theksuar se vetë Hanegbi ka njoftuar për vendimin e kryeministrit, duke kërkuar njëkohësisht “një hetim të thelluar mbi dështimin e 7 tetorit, për të cilin jam bashkëpërgjegjës”.

“Netanyahu më informoi sot për qëllimin e tij për të emëruar një kryetar të ri të Këshillit për Sigurinë Kombëtare – deklaroi Hanegbi – Në këtë kuadër, mandati im përfundon sot. Sigurisht, do të jem në dispozicion të pasardhësit tim, nëse do të jetë e nevojshme.”

Sipas kanalit Ynet, vendimi lidhet me mosmarrëveshje të thella mes tij dhe kryeministrit mbi mënyrën e zhvillimit të luftës. Shkarkimi pritej, pasi Hanegbi ishte kundërshtuar hapur ndaj pushtimit të qytetit Gaza dhe nuk kishte marrë pjesë në vizitën e fundit të Netanyahut në Uashington.

Benjamin Netanyahu

Kryqi i Kuq i ka dorëzuar forcave izraelite në Rripin e Gazës arkivolet e dy pengjeve. Lajmi bëhet i ditur nga zyra e kryeministrit izraelit, Benjamin Netanyahu, e cila shton se trupat tani po transportohen drejt Izraelit, sipas asaj që raporton faqja e Haaretz.

Zëvendëspresidenti i SHBA-së J.D. Vance mbërriti këtë të martë në Izrael. Vizita e tij ka nisur me takime në Qendrën e Koordinimit Civil Ushtarak në Kiryat Gat, në Izraelin jugor, sipas një ekipi të Shtëpisë së Bardhë që e shoqëron atë. Objekti, ku ndodhet forca e re shumëkombëshe e udhëhequr nga Uashingtoni, është përgjegjës për mbikëqyrjen e zbatimit të armëpushimit në Rripin e Gazës. "Zëvendëspresidenti është këtu për takime konfidenciale me anëtarët e forcave të armatosura", thuhet në deklaratën e lëshuar për gazetarët që shoqëronin delegacionin amerikan.

Fluksi i ndihmave në Gaza po rritet, por është ende larg objektivit ideal ditor prej 2,000 tonësh, tha sot Programi Botëror i Ushqimit. Sipas WFP, për të arritur këtë qëllim, duhet shfrytëzuar menjëherë çdo pikëkalim kufitar. Zëdhënësja Abeer Etefa, tha se furnizimet e importuara deri më tani do të jenë të mjaftueshme për të ushqyer gjysmë milioni njerëz për dy javë, duke përdorur vetëm pikat kalimtare Kerem Shalom dhe Kissufim.

Udhëheqësi i Hamasit, Khalil al-Hayya, deklaroi në një intervistë për kanalin Al-Qahira Al-Akhbariya, të cituar nga Times of Israel, se grupi është i gatshëm të gjejë dhe të lëshojë 15 trupat e të zaptuarve të mbajtur në Rripin e Gazës, nëse do t’i jepet më shumë kohë dhe pajisje të rënda. “Jemi të gatshëm t’i rimarrim dhe t’i dorëzojmë të gjithë trupat sipas marrëveshjes, nuk duam të mbajmë askënd: le t’i kthejnë te familjet e tyre, dhe edhe martirët tanë do të kthehen dhe do të varrosen me dinjitet,” tha ai, duke shtuar se është e vështirë të arrihen trupat sepse disa ndodhen nën tokë dhe nën ndërtesa, dhe duke theksuar se kjo kërkon kohë dhe pajisje.