Emisioni investigativ “Le Lene” ka publikuar pamjet nga aksioni i SPAK dhe i policisë, zhvilluar më 16 janar në kullën luksoze “Atti Tower” dhe më pas tek “Downtown One”, ku operonte një rrjet mashtrimi Call Center, pre e të cilëve kanë rënë qindra qytetarë nga shtete të ndryshme të Evropës.

Ka qenë një i infiltruar si operator, i cili nëpërmjet kamerave të fshehura, ka filmuar veprimtarinë e çdo ditë në Call Center si dhe biseda me menaxherin, i cili e instruktonte si të bënte për vete klientin dhe ta bindte për të investuar sa më shumë para.

Nga pamjet e publikuara shihet momenti kur policia ka hyrë brenda në godinën e “Atti Tower” dhe brenda nuk është gjetur asnjë kompjuter i vetëm. “Policia, mos lëviz. Duart mbi tavolinë”, dëgjohen teksa bëhen arrestimet e punonjësve të këtij call-centre, ndërsa ata janë shoqëruar në polici me pranga në duar.

Persona të paguar për të survejuar godinën dhe për t’i bërë pritë çdo rreziku nga institucionet ligjore, lajmëruan për prezencën e agjentëve të BKH-së dhe menjëherë të gjitha materialet, servera, filmime e të tjera, u transferuan me shpejtësi në godinën “Downtown One”, në zyrën e re që po përgatitej për të njëjtën veprimtari. Policia ka arritur të ndalojë shkatërrimin e tyre ndërsa materialet janë transferuar me kosha mbeturinash.

Të arrestuar nga ky operacion janë, Remir Gjoligaj, Endri Gjata, David Qerimi, Elis Merkaj, Hysen Xhepexhiu, Klaudio Kaçupi, të cilët janë lënë në burg me vendim të GJKKO-së ndërsa për dy punonjësit Rentjan Peposhi dhe Odeas Kuqi u caktua masa “arrest me burg” me afat 20 ditë.

Lajmi në përditësim...