Policia ndalon makinën në Lushnjë, pasagjeri del nga mjeti dhe hedh pistoletën në rrugë, por prangoset menjëherë nga efektivët! Në banesë i gjendet edhe një armë gjahu pa leje

Erald Banushi (Mejçak) është arrestuar nga policia e Lushnjes pasi është kapur me armë zjarri pa leje. 32-vjeçari ishte pasagjer në një mjet të ndaluar nga postblloku i ngritur nga Policia.

Policia njofton se gjatë kontrolleve, shërbimet e Policisë, në lagjen ”Çlirimi", në vendin e quajtur “Shinat e trenit”, kanë ndaluar një automjet tip "Volksëagen" që drejtohej nga shtetasi E. Z., 28 vjeç, banues në Vlorë.

Në momentin që ky automjet është ndaluar nga punonjësit e Policisë dhe po i nënshtrohej kontrollit, pasagjeri në mjet, shtetasi E. B. (M)., 32 vjeç, ka tentuar të largohet duke kundërshtuar punonjësit e Policisë dhe ka hedhur në tokë një armë zjarri pistoletë, por është neutralizuar dhe prangosur nga shërbimet e Policisë. 

Gjithashtu, gjatë kontrollit të ushtruar në banesën e 32-vjeçarit, u gjet dhe sekuestrua edhe një armë gjahu pa leje si edhe 20 fishekë luftarak.

Në cilësinë e provës materiale është sekuestruar edhe automjeti tip "Volksëagen" dhe 3 aparate celularë.

Në përfundim të veprimeve hetimore u bë arrestimi në flagrancë i shtetasit E. B. (M)., 32 vjeç, banues në Vlorë, për veprat penale "Mbajtja pa leje e armëve dhe municionit luftarak", "Mbajtja pa leje e armëve të gjahut" dhe "Kundërshtimi i punonjësit të policisë së rendit publik".

Materialet i kaluan Prokurorisë pranë Gjykatës së Shkallës së Parë Lushnjë, për veprime të mëtejshme procedurale.

Pistoleta e sekuestruar

M.Q./Shqiptarja.com

TAG:
• armembajtje pa leje
• policia
• lushnje