Politika ka uruar njëzëri ‘Ditën e Verës’ për të gjithë qytetarët. Nga qyteti i Elbasanit, aty ku festohet më shumë ‘Dita e Verës’, kryeministri Edi Rama ka deklaruar se do të punojë që e nesërmja të shkëlqejë si kjo Ditë Vere. Kryeministri vizitoi panairin ‘Dita e Verës 2018’, ku përcolli dhe një mesazh urues për të gjithë, duke premtuar në vazhdim më shumë punësim, rritje ekonomike dhe siguri.

“Ka filluar të mos mbahet dot mend që kur kemi ardhur këtu në Elbasan për ditën e parë të Verës, por mbaj mend shumë mirë se si ka qenë Elbasani dhe e vërtea është se përsëri në këtë Ditë Verë nuk është e vështirë të shquhen ndryshimet e rëndësishme që kanë ndodhur nga viti i kaluar, të tjera patjetër do të ndodhin.

Më e rëndësishmja është të fuqizojmë vazhdimisht mundësitë e njerëzve për të pasur më shumë punësim, ekonomi, më shumë siguri për të nesërmen. Hap pas hapi diçka po bëhet në funksion të një të nesërmje, që e nesërmja do të shkëlqejë si kjo ditë Vere”, tha Rama.

Edhe kryetari i Partisë Demokratike, Lulzim Basha, ishte sot i pranishëm në Elbasan. Pasi vizitoi Panairin “Dita e Verës 2018”, ai përcolli një përshëndetje për të gjithë shqiptarët. Mes të tjerash, Basha u shpreh se ishte mjaft i gëzuar që së bashku me bashkëshorten, Aurelën, erdhi në këtë qytet për të qenë pjesë e festimeve. Pasi vizitoi Panairin ai ka uruar sipërmarrësit, amvisat dhe tregtarët që  për çdo vit paraqesin punën e tyre.

“Jam impresionuar nga disa prej tyre. Kam parë përparime në industrinë e mjaltit dhe fabrikën e paneleve fotovoltaike. I përmenda disa prej këtyre, sepse janë sektorë që meritojnë mbështetje nga shteti, ulje dhe heqje taksash si dhe subvencione. Nga kryeqyteti i ‘Ditës së Verës’ jap urimin për elbasanasit dhe gjithë shqiptarët.

Ashtu siç çelin lulet në pranverë, ashtu çeltë edhe optimizmi dhe shpresa e çdo shqiptar”, tha Basha.Urimi për ‘Ditën e Verës’ nuk ka munguar dhe nga Presidenti Ilir Meta, i cili shkruan në ‘Facebook’ që ngjyrat dhe tingujt e mrekullueshëm pranveror të përtërijnë optimizmin, shpresën dhe gëzimin në familjen e zemrën e secilit.

“Të dashur miq, Gëzuar Ditën e Verës! Uroj që ngjyrat dhe tingujt e mrekullueshëm pranverorë të përtërijnë optimizmin, shpresën dhe gëzimin në familjet dhe zemrën e secilit prej jush!”, shkruan Presidenti Meta.

urimi meta
(Urimi i Presidentit Ilir Meta)

Urimit për 'Ditën e Verës' i është bashkuar edhe kryetarja e LSI, Monika Kryemadhi, e cila ka postuar në 'Facebook' një foto, ku tregohet se ka ardhur pranvera, ndërsa shkruan: 'Gëzuar'!

monaa
(Urimi i kryetares së LSI, Monika Kryemadhi)

Festës i është bashkuar edhe kryetari i Bashkisë së Tiranës, Erion Veliaj, i cili e nisi ditën duke mbjellë pemë të reja në periferi të Tiranës dhe në Parkun e Liqenit Artificial. Pasi është përshëndetur me qytetarë të shumtë, ai ndoqi nga afër shumë prej aktiviteteve të sotme, si dhe përcolli urimin e tij për të gjithë qytetarët e Tiranës.

“Dua t’u uroj nga zemra, në emër të Bashkisë të Tiranës dhe gjithë qytetarëve tanë gëzuar Ditën e  Verës! Sot kemi pasur një ditë me aktivitete, të gjithë parashikonin që do ishte shi dhe sterrë, por na pa Zoti si i thonë dhe kemi patur një ditë fantastike. E filluam me disa mbjellje masive në rrethinat e Tiranës, pastaj nga Liqeni, ku kemi patur pafund aktivitete e tani këtu në sheshin “Skënderbej”. Dua të falënderoj aeuronatikën dhe dua t’ju uroj të gjithëve një stinë të mbarë. Stina e pranverës, stina e verës, ardhja e një moti të ri  është ndoshta një moment për të reflektuar  e për të kuptuar që kur ne jemi bashkë, ne bëjmë mrekulli”, theksoi Veliaj.

Kreu i Bashkisë së Tiranës siguroi se pavarësisht disa debateve, puna për ndërtimin e Tiranës do të vijojë, ndërkohë që siguroi nisjen e disa projekteve të rëndësishme për qytetin sikurse Piramida , Teatri i ri dhe pjesa e mbetur e Bulevardit të Ri. “Pavarësisht debateve që pati, kur ndërtuam këndin e lojërave pavarësisht debateve që pati, kur ndërtuam Pazarin e Ri, pavarësisht debateve që pati, kur ndërtuam bulevardin e ri, pavarësisht debateve që pati, do të vazhdojmë në këtë mot të ri për të ndërtuar më shumë në Tiranë pavarësisht debateve që do kenë. Kjo do të jetë Piramida, do të jetë teatri I ri, do të vazhdojmë me fundin e bulevardit. Ne kemi mësuar që çdo ndryshim vjen me një rrëmujë të madhe, por kur ndryshimi vjen, të gjithë e përqafojnë dhe harrojmë që shumë prej gjërave që kemi kritikuar e debatuar janë sot pikat më të nxehta të qytetit”, u shpreh ai.

Veliaj theksoi se është momenti që të gjithë të fokusohen te puna dhe të tregohen bashkëpunues dhe mbështetës për të mos humbur kohë. “Në e shihni ku ka qenë popullsia më e madhe sot ka qenë tek liqeni, tek këndi I lojërave, këtu te ky sheshi i ri “Skënderbej” dhe Pazari i Ri e tek bulevardi i ri. Prandaj hajde të fokusohemi që të jemi pozitivë të jemi dashamirës, të jemi ndërtues, të jemi mbështetës ndaj njëri-tjetrit. Sa herë që zihemi e përçahemi humbasim kohë të çmuar, por disa herë që punojmë të fokusuar me optimizëm e energji pozitive, ne bëjmë mrekulli. Faleminderit të gjithëve nga zemra dhe ju uroj gëzuar ditën e verës”, deklaroi Veliaj.

Për më shumë se tre orë në Bulevardin “Dëshmorët e Kombit” u mbajt një koncert me këngëtarët e njohur si Arilena Ara, Sidrit Bejleri, Eneda Tarifa, Lorenc Hasrama, Fifi, Denisa Gjezo& Band, ndërsa përballë piramidës Piramida ishte një tjetër skenë e muzikës ku performuan Dee Jay, Dj Aldo, DjSardi, Dj Mickey, Chriss V, VinVeli, Abel Dj.

Sikurse është bërë tashmë traditë, Parku i Liqenit Artificial ishte një nga destinacionet më të preferuara nga qytetarët, me varka dhe kanoe për argëtim, aktivitete sportive, panair dhe shëtitje buzë liqenit që gjallëruan këtë zonë të qytetit në këtë ditë të shënuar. Në rrugë të ndryshme të qytetit janë ndërtuar skena më të vogla për të vegjlit.

Aktivitetet festive me rastin e kësaj dite mbyllen në mesnatë ku të rinjtë në pika të ndryshme të qytetit do të kenë mundësi që të ndjekin DJ dhe këngëtarët më të mirë të momentit të zhanreve të ndryshme muzikore.

d.c./shqiptarja.com