Pr.igji për sektorin e gazit natyror 
 Gjiknuri: Kontribut në energji

Ministri i Energjisë dhe Industrisë, Damian Gjiknuri, u shpreh të mërkurën përpara deputetëve në Komisionin për Veprimtarinë Prodhuese se miratimi i projektligjit “Për sektorin e gazit natyror”, së bashku me miratimin pak kohë më parë të ligjit të ri “Për sektorin e energjisë elektrike”, do të përbëjë një kontribut të rëndësishëm në realizimin e politikave të Qeverisë për mbështetjen e zhvillimit të sektorit energjetik në Shqipëri.

“Projektligji synon amendimin e ligjit ekzistues të vitit 2008, në bazë të implementimit të Paketës së Tretë të Energjisë të Bashkimit Evropian, në drejtim të zhvillimit dhe  liberalizimit të sektorit dhe tregut të gazit natyror dhe kjo nismë ligjore është përgatitur me asistencën e Sekretariatit të Komunitetit të Energjisë “-tha Gjiknuri.

Gjatë fazës së hartimit të tij, vijoi kreu i energjitikës, janë marrë parasysh dhe janë reflektuar edhe zhvillimet e kohëve të fundit në legjislacionin shqiptar të cilat direkt apo indirekt kanë të bëjnë me sektorin e gazit.

“Veçanërisht është patur në konsideratë dhe ka gjetur reflektim kuadri ligjor dhe rregullator për zhvillimin e projektit të gazsjellësit Trans Adriatic (projekti TAP), duke garantuar edhe në këtë projektligj të ri vazhdimësi dhe stabilitet në aspektin legjislativ”-tha Gjiknuri.

Projektligj “Për sektorin e gazit natyror” (me 9 kapituj dhe 117 nene) përbëhet nga dy shtylla kryesore:
1-Organizimin dhe funksionimin e tregut të gazit si një treg i rregulluar, i cili në bazë të Paketës së Tretë të Energjisë të BE për sektorin e gazit natyror, do të jetë një treg “plotësisht i hapur/ i liberalizuar”. 2-Ndërtimi dhe funksionimi i infrastrukturës dhe impianteve të gazit (përfshirë aspektin teknik dhe teknologjik), për furnizimin, transportimin, depozitimin dhe shpërndarjen e gazit natyror.

Sipas ministrit Gjiknuri,  në rastin e gazit, duke qenë se kemi të bëjmë me një burim energjetik natyror që përfshihet në hidrokarburet (qoftë si gaz natyror apo edhe si gaz shoqërues), aktiviteti për prodhimin e tij rregullohet nëpërmjet legjislacionit “Për kërkimin dhe prodhimin e hidrokarbureve”.
Nëpërmjet këtij projektligji të ri janë parashikuar ndryshime të rëndësishme në kuadrin ligjor për sektorin e gazit, ndryshime të cilat konsistojnë në: Ruajtjen dhe garantimin e stabilitetit ligjor dhe institucional.

Saktësimin e përgjegjësive dhe kompetencave të Ministrisë përgjegjëse për sektorin e energjisë. Rritjen e rolit dhe të përgjegjësive të ERE kryesisht në lidhje me monitorimin e tregut, konkurencën dhe mbrojtjen e konsumatorit. Përcaktimet për përgatitjen e Rregulloreve për aktivitetin e depozitimit nëntokësor të gazit dhe për gazin natyror të lëngëzuar.

Rregullimin e çështjeve të pronësisë në aktivitetin e gazit natyror, duke caktuar saktësisht grupin e te drejtave qe preken, përsa kanë të bëjnë me infrastrukturën dhe instalimet përkatëse. Rritjen e bashkëpunimit ndërmjet subjekteve, organeve shtetërore të përfshira në këtë ligj./ ATSH

Redaksia online
(s.m/shqiptarja.com)