Prapaskenat,28 deputetët që
firmosën për Arta Markun

Shqiptarja.com zbardh prapaskenat e zgjedhjes së Arta Markut në krye të Prokurorisë së Përgjithshme deri kur të konstituohet Këshilli i Lartë i Prokurorisë, i cili do t’i propozojë Kuvendit tre kandidatë për kryeprokuror. Paraditen e djeshme, 28 deputetë të PS hodhën firmat, duke dhënë pëlqimin për zgjedhjen në krye të organit të akuzës, Arta Markun.

Mes deputetëve propozues janë Taulant Balla, Ervin Bushati, Ulsi Manja, Ermonela Felaj, Vasilika Hysi, Edmond Leka, Bashkim Fino, Sadri Abazi, Sadi Vorpsi, Pjerin Ndreu, Adelina Rista, Ismet Beqiraj, Flamur Golemi, Anduel Xhindi, Almira Xhembulla, Edlira Bode, Vilma Bello, Ilir Pendavini, Ilir Xhakolli, Besnik Baraj, Bledar Çuçi, Antoneta Dhima, Elona Hoxha, Ilir Ndraxhi etj. Shqiptarja.com ka zbardhur edhe arsyetimin e 28 deputetëve për dhënien e pëlqimit të tyre. Ata thonë se e mbështetën zonjën Marku për zbatimin e reformës në drejtësi, përmbushjen e kushteve për integrimin në BE dhe ngritjen e Këshillit të Lartë të Prokurorisë.

“Ne, një grup prej 28 deputetësh, duke vlerësuar rendësin vitale të zbatimit të Kushtetutës, me qëllim fillimin e zbatimit e vënies në jetë të reformës në sistemin e drejtësisë për përmbushjen e standardeve të kërkuara nga Bashkimi Evropian, si kriter kryesor për anëtarësim të Shqipërisë në BE; Duke qenë të gatshëm për të dhënë mbështetjen tonë të plotë për vijimin e procedurave për ngritjen e Këshillit të Lartë të Prokurorisë, si organi i vetëm kushtetues që do të zhvilloje një proces të plotë dhe tërësor për verifikimin dhe përzgjedhjen e kandidaturave që do t'i paraqiten Kuvendit për zgjedhjen e Prokurorit të Përgjithshëm me mandat 7-vjeçar ... i paraqesim Kuvendit për miratim kandidaturën e znj. Arta Ndrec Marku”, thuhet në arsyetimin e deputetëve.

PS i mungojnë pesë vota
Gjatë seancës së djeshme, Partisë Socialiste i munguan pesë vota. 69 deputetë votuan pro, dy kundra dhe dy abstenim për kandidaturën e zonjës Arta Marku për kryeprokurore e përkohshme. Partia Socialiste ka 74 deputetë.

Pesë ligjvënës së Partisë Socialiste nuk kanë votuar për Arta Markun, disa në pamundësi për të votuar, disa kanë votuar kundër linjës së partisë ose kanë abstenuar dhe të paktën një deputet nuk ka marrë pjesë në seancë.

Nga grupi parlamentar socialist ka munguar ish-ministri i Brendshëm Saimir Tahiri. Ndërsa nga PDIU morën pjesë dy deputetë, Reme Lala dhe Aqif Rakipi, por për ata nuk dihet si kanë votuar. Kujtojmë që PDIU paralajmëroi pak ditë më parë se do votonte kundër Kryeprokurorit të Përkohshëm.

 

Musa Ulqini: Monika më mori kartën

 

Njëri nga pesë deputetët, Musa Ulqini, sqaroi për Report Tv se nuk kishte mundur që të votonte. Ulqini pranoi se ishte njëri prej 5 deputetëve të PS që nuk votoi, ndërsa sqaroi për Report Tv se ishte në pamundësi për të votuar, pasi nuk kishte kartën.

Ai ka theksuar se kartën e tij të votimit ja ka marrë kryetarja e LSI, Monika Kryemadhi. “Jam një nga ata që nuk votuan. Isha në pamundësi për të votuar, nuk kisha kartën. Kryemadhi më mori kartën të parit. Nuk votova sepse karta ime u hodh larg nga Kryemadhi”, tha Ulqini.

d.c./shqiptarja.com