Presidenca: Ministria na informoi dy
orë pas votimit kundër SHBA në OKB

Presidenti i Republikës, Ilir Meta ka reaguar edhe një herë lidhur me qëndrimin e institucionit për votën e Shqipërinë në OKB. Presidenca ka bërë të ditura prapaskenat  dhe komunikimin me Ministrinë e Jashtme për votën që do të jepte Shqipëria në OKB për shpalljen e Jeruzalemit kryeqyteti i Izraelit. Presidenca ka ritheksuar edhe një herë tjetër, se “nuk ka patur asnjë informim dhe konsultim paraprak nga ministria e  drejtuar prej Ditmir Bushatit, në drejtim të kabinetit të Presidentit të Republikës për votimin në OKB”.

Për herë të parë, disa ditë pas votimit në OKB institucioni i Presidencën sjell detaje të reja për disa komunikime mes dy institucioneve se si do të votonte Shqipëria në OKB. Presidenca thotë se: “Vetëm disa minuta para votimit, Drejtori i Kabinetit të Presidentit, z.Arben Cici i ka telefonuar me iniciativën e tij për shkak të sensibilitetit të çështjes, Drejtorit të Përgjithshëm Politik në MEPJ, z.Ferit Hoxha për t’u njohur me vendimin për mënyrën e votimit të Shqipërisë në OKB, nga i cili ka marrë përgjigje që:   “Nuk ka ende një vendim por po vazhdojmë konsultimet”, por jo me kabinetin e Presidentit.

Pak minuta më vonë, Presidenti i Republikës,  Ilir Meta është njohur me qëndrimin e Shqipërisë në OKB vetëm përmes mediave online, ashtu si gjithë qytetarët e vendit. Për informacion më të saktë njoftojmë se Drejtori i Kabinetit në Presidencë, z. Arben Cici ka marrë një njoftim me sms nga Drejtori i Përgjithshëm Politik në MEPJ, z. Ferit Hoxha, vetëm në orën 18:24, rreth dy orë e gjysëm pas votimit, me një “Pro” rezolutës”. Nuk ekziston asnjë komunikim tjetër i mëparshëm midis Kabinetit të Presidentit me MEPJ dhe shërbimin diplomatik” deklaron zyra e shtypit të Presidentit. 

dy.b/shqiptarja.com