Presidenti Donald Trump sulmon Kinën në Twitter: Tarifa të reja me vlerë 75 miliardë dollarë

Presidenti Donald Trump sulmon Kinën në Twitter: Tarifa të reja me vlerë 75 miliardë dollarë

Presidenti Donald Trump sulmoi Kinën në Twitter, duke thënë se ai do t’i përgjigjej shumë shpejt tarifave të vendosura nga Kina ndaj mallrave amerikane me vlerë prej 75 miliardë dollarësh.

Ndërkaq, ai u bëri thirrje kompanive amerikane të kërkojnë mënyra për t’i mbyllur operacionet e tyre në Kinë dhe të prodhojnë më shumë mallra në Shtetet e Bashkuara.

Ligjërisht, presidenti nuk mund t’i detyrojë kompanitë amerikane të ikin nga Kina dhe në fakt ai nuk dha hollësi se si mund ta bëjë këtë.

Kina njoftoi gjithashtu të premten se do të rifillojë t’u vërë tarifën prej 25 për qind automjeteve amerikane, si shpagim ndaj planit të Presidentit Trump për të taksuar mallrat kineze duke filluar nga 1 shtatori.

Tarifat kineze për disa produkte amerikane do të hyjnë në fuqi më 1 shtator ndërsa të tjerat më 15 dhjetor.

Në reagimin e tij, Presidenti Trump përsëriti argumentin se Amerika prej vitesh humbet triliona dollarë në tregtinë me Kinën dhe mes të tjerash e ka lejuar Kinën të vjedhë pasurinë intelektuale amerikane.

Ai tha se Kina synon të vazhdojë në këtë rrugë, por se ai nuk do ta lejojë këtë të ndodhë.

Presidenti amerikan deklaroi gjithashtu se “Ne nuk kemi nevojë për Kinën dhe do të ishim shumë më mirë pa të.”

Komentet e tij shkaktuan rënien e tregjeve amerikane të aksioneve sot paradite.

Ekspertët thonë se administrata mund të përdorë politikat e taksave, tarifat apo sanksionet për të ulur ose eliminuar aktivitetin e kompanive amerikane në Kinë, por do të duheshin shumë vite që këto politika të japin rezultat nëse zbatohen.

Disa vende si Vjetnami dhe Meksika kanë përfituar nga lufta tregtare mes dy gjigantëve, sepse shumë kompani amerikane po i zhvendosin atje operacionet e prodhimit që i kanë mbyllur në Kinë për shkak të tarifave.

Ndërkaq, SHBA dhe Kina nuk i kanë ndryshuar planet për të zhvilluar një raund bisedimesh tregtare ballë për ballë muajin e ardhshëm.

Këshilltari ekonomik i Shtëpisë së Bardhë Larry Kudlow tha se diskutimet e kësaj jave midis negociatorëve në nivel zëvendësash ishin konstruktive.

Kina dhe SHBA janë përfshirë në një betejë tarifash që ka prekur tregjet botërore.

Analistët shqetësohen se një luftë tregtare mes dy vendeve mund t’i çojë Shtetet e Bashkuara drejt një recesioni.

Presidenti Trump kritikoi gjithashtu në Twitter Kreun e Rezervës Federale (Bankës Qendrore) Jerome Powell, përpara dhe pas fjalimit të mbajtur nga  Powell në simpoziumin vjetor të këtij institucioni, fjalim që u ndoq me vemendje të madhe.

Powell la të kuptohej se Rezerva Federale, e cila uli normat e interesit muajin e kaluar për herë të parë pas një dekade, është e gatshme të bëjë një ulje tjetër për të ruajtur rritjen ekonomike të SHBA. Por ai nuk specifikoi se sa herë dhe kur mund të ulen interesat. Kjo e zemëroi Presidentin Trump, i cili shkroi në Twitter: "Si zakonisht, Rezerva Federale nuk bëri asgjë! Është e pabesueshme se si këta njerëz flasin pa e ditur ose pa pyetur fare se çfarë jam duke bërë unë, gjë që do të njoftohet së shpejti.”

Presidenti pastaj shtoi: "Pyetja ime e vetme është, kush është armiku ynë më i madh, Jay Powell apo Kryetari Xi (i Partisë Komuniste Kineze dhe President i Kinës)?"

Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Si do jenë ndryshimet në Kodin Zgjedhor që do bëjnë PS-Rithemelimi?



×

Lajmi i fundit

Një shesh në Tiranë do të mbajë emrin e Dr. Florit, ja ku ndodhet

Një shesh në Tiranë do të mbajë emrin e Dr. Florit, ja ku ndodhet