Presidenti Donald Trump zbulon
detaje të takimit me Vladimir Putin

Presidenti amerikan Donald Trump tha të dielën se ai e kishte pyetur dy herë me këmbëngulje Presidentin rus Vladimir Putin për ndërhyrjen e Rusisë në zgjedhjet amerikane dhe se tani ka ardhur koha “që të ecim përpara dhe të punojmë në mënyrë konstruktive” me Moskën.
 
Në një sërë komentesh në Twitter pasi u kthye nga Uashingtoni nga takimi i G-20-ës në Hamburg të Gjermanisë, zoti Trump theksoi se Putin kishte mohuar me forcë çdo rol në ndërhyrjen në zgjedhje dhe se dy presidentët “kishin diskutuar për krijimin e një njësie të padepërtueshme për Sigurinë Kibernetike në mënyrë që të shmanget pirateria kibernetike në zgjedhje dhe elementë të tjerë negativë”.
 
Por ligjvënës republikane me peshë, e kanë quajtur qesharake idenë e bashkëpunimit me Rusinë për një pakt për sigurinë kibernetike. Senatori Lindsey Graham tha në emisionin “Meet the Press” të televizionit NBC se nuk ishte “ideja më idiote që kam dëgjuar ndonjëherë, por po i  afrohet”.
 
Ndërsa në Kiev Sekretari amerikan i Shtetit, Rex Tillërson tha se pala amerikane nuk priste “ndonjë përgjigje të ndryshme nga ajo që mori”, dhe tha se u bë e qartë që kjo është një çështje shumë shqetësuese për popullin amerikan.
 
“Dhe mendoj se ajo mbetet një pengesë për aftësinë tonë për të çuar përpara marrëdhëniet me Shtetet e Bashkuara dhe Rusinë dhe duhet të trajtohet përsa i takon nevojës për të siguruar popullin amerikan se nuk do të ketë ndërhyrje në zgjedhjet amerikane nga Rusia, apo askush tjetër”.
 
Shefi i Personelit i Shtepisë së Bardhë, Reince Priebus tha në një intervistë për televizionin Fox News se zoti Trump “nuk e kishte besuar plotësisht” mohimin e zotit Putin për ndërhyrje në zgjedhje.
 
Në një nga mesazhet në Twitter, zoti Trump tha se e “kishte dhënë mendimin e tij” për ndërhyrjen në zgjedhje. Mesa duket tani po i  referohet pohimit të tij javës së kaluar në Varshavë kur tha se “mund të kishte qënë Rusia, ose dhe njerëz dhe vende të tjera”.
 
Takimi mes dy presidenteve Trump dhe Putin ishte pritur me interesim të madh dhe zgjati shume më tepër nga sa ishte parashikuar. Zoti Trump e quajti takimin e G20-ës një sukses të madh për Shtetet e Bashkuara, por nuk përmendi faktin që 19 vendet e tjera shprehën kundërshtimin e tyre ndaj tërheqjes amerikane nga marrëveshja e Parisit për klimën./Voa


Redaksia online
D.M/Shqiptarja.com