Presidenti, Holtkemper:
Mbështesim konsensusin

TIRANE- Zërave të diplomatëve të huaj që komentojnë mbi zgjedhjen e presidentit të ardhshëm të vendit, u është shtuar edhe ambasadorja gjermane në Tiranë, Karola Holtkemper. Gjatë një vizite në qytetin e Burrelit, Holtkemper, tha se presidenti duhet të zgjidhet sipas rregullave dhe kushtetutës vendase, por nënvizoi se për pozicionin në fjalë, mirëpritet një kompromis mes palëve dhe se kandidati duhet të ketë disa cilësi të vecanta për të qenë në krye të shtetit. "Presidenti duhet të zgjidhet sipas rregullave. Shqipëria e ka një Kushtetutë ku përcaktohet qartë se si zgjidhet presidenti, por ne mbështesim një konsensus mes palëve për të gjetur një emër që ka cilësitë e vecanta për të qenë president", tha ambasadorja Holtkemper.

GJIKNURI
Nga ana e tij, sekretari socialist për çështjet Zgjedhore, Damian Gjiknuri, flet për momentin e zgjedhjes së Presidentit të Republikës. Ai thotë për TCH se në tre raundet e para të votimit pjesëmarrja e 84 deputetëve është e domosdoshme jo vetëm për ta zgjedhur Presidentin, por edhe për t'i zhvilluar vetë seancat. Sipas Gjiknurit, kuorumi i cilësuar del nga interpretimi i frymës së Kushtetutës. "Për kryetarin e shtetit shqiptar, që është figurë e unitetit, ka vullnet përtej një mazhorance të thjeshtë. Po të interpretosh Kushtetutën, ka vend për të diskutuar, në vecanti për figurat e shtetit. Fakti që parashikohen tre raunde me shumicë të cilësuar tregon se Kushtetuta e ka pasur parasysh konsensusin. Ndryshe nuk kishte përse këto tre raunde të qendronin", tha Gjiknuri. "PS është shprehur se është për një dialog për të zgjedhur një figurë konsensuale. Nuk duam të bëjmë një luftë votimi në Parlament pa gjetur më parë një figurë të tillë. Për ne, dërgimi i çështjes në gjykatë është një debat i parakohshëm. Tani e rëndësishme është që të ulemi e të dialogojmë, pa paragjykuar asnjë emër. Cështja për t'i kërkuar mendim gjykatës është diçka që duhet parë, por në kohën e vetë", thekson Gjiknuri.
(sg/shqiptarja.com)